Соңғы жылдары облыс аумағындағы жекелеген ауылдардың ішін жал-жал құмдар алып кеткен. Бұл жергілікті тұрғындарды алаңдатып отырғаны жасырын емес. Құм көшкіні, әсіресе Исатай, Құрманғазы, Жылыой аудандарының елді мекендерінде басымырақ орын алуда. Иектеп алған қалың құм Исатай ауданындағы Исатай, Зинеден ауылдарындағы көше бойларына дейін жеткен.
Кезінде қорғанудың бірден-бір жолы - сексеуілді көптеп егу арқылы тосқауыл қою деп ұйғарылды. Қазір осылай жасалып жатыр. Табиғи ресурстар және табиғат пайдалануды реттеу басқармасының мәліметі бойынша, 2020-2021 жылдарға Жылыой ауданы Майкөмген ауылындағы жобаны жүзеге асыру үшін 77 млн теңге, жалпы егу жұмыстарына 6 га жер бөлінді.
Жұмыс ішінара жасалды және әрі қарай жалғасады. Исатай ауданы Кобяково-Забурын каналының бойындағы жұмыстарға жергілікті бюджеттен 138 млн теңге бөлінді. Егу жұмыстары жалпы алаңы 7,9 га болатын 4 учаскеде жүргізіліп жатыр.
Исатай ауылы үшін 115,1 млн теңге бөлінді, жалпы алаңы 9 га.
Бұрын «АЖ» басылымында жазылған Құрманғазы ауданы Үштаған ауылы үшін жобалық-сметалық құжаттама дайындалған, 10 гектарға сексеуіл егіледі.
Әрі қарай бұл қорғаныс белдеулер ауылдық округтердің балансына өтеді.
Ләззат ҚАРАЖАНОВА