В Атырау +23.2 
Алматыға жақын далада «Dog House "Твардовский дом"» панажайының негізін қалаушы Владимир Тепляковтың күтпеген жерден қайтыс болуынан кейін 90-ға жуық ит қиын жағдайда қалды. Волонтерлер күн суытқанға дейін жануарларға жаңа иелерін шұғыл іздеп жатыр.
Бұл қайғылы жағдай туралы жануарларды қорғаушы Арсен Кабденов хабарлады. Оның айтуынша, Владимир Тепляков көп жыл бойы қараусыз қалған жануарларды құтқаруға арнаған. Ол панажайды 2015 жылы ашып, оны марқұм ұлының құрметіне атаған. Жоба жұмыс істеген жылдар ішінде бірнеше рет орнын ауыстырып, қаржылық қиындықтарға тап болған.
Қазір ондаған төрт аяқты жануар қоршауы мен тиісті жағдайы жоқ, ашық жерде қалып отыр.
«Осы жылдар ішінде олар бірнеше рет көшіп, әр жолы бәрін қайта бастауға мәжбүр болды. Қазір иттер далада, тиісті қоршау мен жағдай жоқ. Үлкен қоршау мен вольерлер салу қазіргі уақытта қаржылық тұрғыдан өте қиын. Сондықтан қайғылы жағдайдан аз уақыт бұрын Владимирмен оның барлық иттеріне жаңа отбасылар іздеу мәселесін талқылаған едік. Ол бұл ұсынысқа келісті», — деді Арсен Кабденов.
7 қазанда Владимир Тепляковтың белгісіз жағдайда қайтыс болғаны белгілі болды. Панажайдың бүкіл тіршілігі мен жануарлардың күтімі оның мойнында болғандықтан, оның қазасынан кейін иттер алда келе жатқан суықтың алдында қараусыз және қорғансыз қалды.
Қазір қоғамдық белсенділер мен жанашыр азаматтар иттерге жаңа үй табуға тырысып жатыр. Олар Алматы қаласы мен облысының тұрғындарын жануарларды өз үйлеріне алып, панажайдағы иттерге көмектесуге шақырады.