​Атыраулық параволейболшылар Қазақстан құрамасының әлем кубогында қола жүлде алуына үлес қосты

Отырып ойнау волейболынан Қазақстанның ерлер ұлттық құрамасы алғаш рет Әлем кубогында қола жүлдені иеленді. Команда сапындағы 13 спортшының 10-ы – Атырау облысының спортшылары. Дода 9-18 қазан күндері АҚШ-тың Индиана штаты, Форт-Уэйн қаласында өтті, деп хабарлайды Өңірлік коммуникациялар қызметі.

Қола медаль үшін өткен шешуші матчта Қазақстан құрамасы алаң иелері – АҚШ командасын 3:1 есебімен тізе бүктіріп, тарихи жеңіске қол жеткізді.

Биылғы әлемдік додада ерлер арасында 14, әйелдер арасында 6 команда бақ сынады. Іріктеу кезеңінде Қазақстан спортшылары Италия, Канада, Польша, АҚШ, Таиланд және Франция командаларына қарсы сәтті өнер көрсетті.

– Әлем кубогындағы қола жүлде – біздің параспортшылардың жоғары деңгейдегі шеберлігін айқындайтын маңызды жетістік. Сонымен қатар, бұл нәтиже 2028 жылы Лос-Анджелесте өтетін Паралимпиада ойындарына жол ашатын маңызды рейтингтік ұпайларды алып келді. Құрама енді Әлем чемпионаты мен Азия біріншілігіне дайындықты жалғастырады, – деді ұлттық құраманың бас бапкері Бауыржан Тахауов.

Айта кетейік, Қазақстан параволейбол құрамасы биыл алғаш рет Азия чемпионы атанған болатын.