Әскер қатарына шақыру өз кезегімен жүріп жатыр

1 қыркүйекте елімізде әскер қатарына шақырудың күзгі науқаны басталды. Атырау мен аудандардан келген жүздеген бозбалаға SMS хабарлама немесе үй мекенжайына әскери комиссариаттан шақырту қағазы келген. Алайда, әскерде орын алған бірнеше өлім мен суицид әрекетінен кейін жігіттердің де, олардың ата-анасының да алаңдауы түсінікті. Әскер қатарына қабылданушылардың көңіл-күйін «АЖ» тілшісі барлап келген еді.

Таңертең Атырау облысының қорғаныс істері жөніндегі департаментінде тыныштық орнаған екен. Басшының орынбасары подполковник Асхат АЙТЕНОВТІҢ (суретте) айтуынша, бір күн бұрын 65 сарбаздан тұратын әскер қатарына шақырылғандардың төртінші командасы жіберілген.

Әскердегі қайғылы оқиғалардан кейін облыстық әскери комиссариатқа журналистер жиі келіп, әскери қызметкерлердің баспасөз назарынан шаршағаны байқалады. Әскердегі өз-өзіне қол жұмсау тақырыбын айналып өтіп, сұхбат алушылар сөздерін дұрыс түсінбей қалар-ау деп, алаңдайтыны сезіледі.

Ал жастар әскер қатарына кезекпен шақырылып жатыр. Әскерден жалтарғандар да бар, бірақ мың АЕК көлемінде айыппұл салу немесе түзеу жұмыстарына тарту немесе бас бостандығын шектеу немесе бір жылға дейін бас бостандығынан айыру жазасы бар екені айтылғаннан кейін әскери борышын өтеуге мойынсұнады екен.

Қазір «чекистерді» іріктеп жатқан көрінеді. ҚР Шекара қызметі Қарулы Күштердің элиталық түрлерінің бірі саналады. Бұл жағдайда әскерге шақырылғандар тек медициналық комиссия мен психологиялық тестілеуден өтіп қана қоймай, полиграфтан – жалғандық детекторынан да өтеді.

18 жастағы Қылышбек АЯН Құлсары қаласынан келіпті, Атыраудағы колледжді бітірген, арманы - әскерден кейін Орал қаласында жоғары білім алу. Ол әскери билетім болса, заңгер мамандығын бастауға мүмкіндік көп деп есептейді. Өзінен үлкен ағалары да әскери борышын өтеп келіп, еңбек етіп жатыр екен.

Әскери комиссариаттың медициналық қызметінің бастығы, капитан Серік КҮЗЕРБАЕВТЫҢ пікірінше, жігіттердің көңіл-күйі көп жағдайда отбасына байланысты. Ол былтыр әскерге шақырылғандардың бірінің ата-анасы ұлын үйіне қайтарамыз деп екі апта бойы бақылау-өткізу пунктінің табалдырығын тоздырғанын айтып берді:

- Оның әскери борышын өтемеуіне мүмкіндік беретін әлдебір ауруы бар деген анықтама әкелді. Анықтама мұқият тексеріліп, оның жалған екені анықталды. Оның үстіне, әскери қызметін өтеп жатқанына екі апта болғанда, оны қалай қайтарар едік? — дейді капитан.

Ведомствоның атап өтуінше, қазіргі жастар, айталық, 20 жыл бұрынғыдай физикалық тұрғыдан дамымаған. Әрине, мықтылары бар, бірақ ондайлар сиреп барады.

Біздің өңірден күзгі шақыру аяқталғанға дейін ҚР Қарулы Күштері қатарына тағы 600-ге жуық сарбазды жіберу жоспарлануда. Ал Қорғаныс министрлігі болса, «Өміріңді сақта» деп аталатын кешенді ведомствоаралық профилактикалық бағдарламаны әзірлеуді аяқтап қалған: «Жеке құрамның моральдық-психологиялық жағдайын бақылау мақсатында» ведомство әлеуметтік сауалнамалар мен анонимді сауалдар жүргізуді жоспарлап отыр.

Анастасия ШЕРСТЯНКИНА

Суреттерді түсірген автор

«АЖ» АНЫҚТАМАСЫ: Қорғаныс министрлігінің мәліметінше, 2022 жыл басталғалы төрт сарбаз өз-өзіне қол жұмсап, жетеуінің өз-өзіне қол жұмсау әрекеті тіркелгені, бір сарбаз «сапта тұрған кезде құлап», қайтыс болды.