Құрманғазы ауданы Жапырақты ауылының тұрғыны Ғалымжан МҰҚАШЕВ ескі заттарды жинауды бала кезінен бастаған. Жақында ол өз үйінен ретро-музей ашуды ұйғарды. Бір бөлмеге сыйған шағын музейде түрлі заман жәдігерлері қойылған, - деп хабарлайды Өңірлік коммуникациялар қызметі.
Ғалымжан Мұқашев көп жыл есепші болып еңбек еткен. Қазір құрметті демалыста. Сирек кездесетін көне заттарды жинау – оның хоббиі. Шағын музей ашу көптен бері ойында жүрген. Алғашқы жәдігері анасының ұршығы екен. Ал қазір музейде 100-ден астам жәдігер бар.
Құрманғазы ауданы әкімдігінің баспасөз қызметінің мәліметінше, шағын музейге келушілер, әсіресе, өткен ғасырдың 50-70-жылдарына тиесілі бұйымдарды тамашалайды. Алайда одан да көне бұйымдар бар. Мәселен, музейге малдың сүйегінен жасалған көне ұршық та қойылған.
- Бұл жерден төл теңгенің алғашқы нұсқаларын да табуға болады. Өткен ғасырдың ортасында шығарылған теледидар мен радиоқабылдағыш, көне сағаттар мен музыкалық аспаптар және басқа да бұйымдар бар. Бәрі түпнұсқа қалпында сақталған, - деп хабарлайды баспасөз қызметі.
Музей иесі оны пайда табу үшін ашпағанын айтады:
- Ұрпағым, немерелерім бар. Соларға мұра болып қалсын деген ниетім еді. Адамдарға да сол кездегі бұйымдар арқылы өткенді танып-білу әрі қызық, әрі пайдалы деп ойлаймын.
Енді Ғалымжан Мұқашев келушілерді қуанту үшін музейді кеңейтіп, жәдігерлер санын көбейтуді мақсат етіп отыр.
Дайындаған Айнұр САПАРОВА
Құрманғазы ауданының баспасөз қызметі ұсынған суреттер