Атыраудағы үш ауысымды мектептерде алты күн сабақ оқиды - ата-аналар наразы

Атыраудың үш ауысымды мектептерінде бес күндік оқуға тек бастауыш сынып оқушылары ғана ауыса алады, қалғандары аптасына алты күн оқуды жалғастырады. Кем дегенде алты ай. Содан кейін облыс орталығында «Binom» мектептерін пайдалануға беріп, 8 мың оқушы орнын қамтамасыз етуге уәде беріп отыр.

Ал, бүгін, 5 қыркүйекте жаңа оқу жылынан бастап үш ауысымдық мектепке айналған №2 мектептің жанына балаларына сенбіде де сабақ қосылғанына наразы ата-аналар жиналды. Бұл ретте жұмыс күндеріндегі сабақтар саны қысқармаған. Ата-аналардың көбі балаларын сенбі күні қосымша сабақтарға жазып, ақшасын төлеп тастаған.

– Бізге бала өте көп, орынжай жетіспейді дейді. Бірақ ықшамаудандарды, мектептерді жоспарлаған кезде бұл туралы неге ешкім алдын ала ойластырмайды? Әкімдіктің, облыстық білім басқармасының стратегиялық жоспары қайда? - дейді ата-аналар наразы болып.

Облыстық білім беру басқармасының басшысы Гүлнәр СӘДУАҚАСОВА мұндай жағдай қазір үш ауысымды 11 мектептің барлығында байқалатынын айтты.

– Күні кеше сенбіде 16-мектептің ата-аналары да наразы болды. Осы 11 мектептің тым болмаса төменгі сынып звеносы аптасына 5 күн оқитындай етіп кері кесте жасадық. Орта және жоғары сыныптарға, өкінішке орай, олай жасалмайды. Орын жеткіліксіз. Мысалы, №2 мектеп 680 оқушыға есептелген, ал онда 2 мың оқушы оқиды, №16 мектепте де 2 мың оқушы бар. Қазіргі уақытта бұған ештеңе жасау мүмкін емес. Бірақ балаларыңызды жақын маңдағы мектептерге ауыстыра аласыз. Мысалы, №2 мектептен №15 мектепке. Жарты жылдан кейін Сарыарқа мен Нұрсая ықшамауданындағы «Binom» мектебінің әрқайсысы 2 мың орындық екі мектеп ғимараты пайдалануға берілуі тиіс, онда екі ауысымда 8 мың бала болады. Бірінші кезекте ол жерге тұрғылықты жері бойынша тиесілі балалар қабылданады. Осылайша, үш ауысымда оқитын мектептердің жүктемесі азаяды, - деп сендірді білім беру басқармасының басшысы жиналғандарды.

Рас, төменгі сынып оқушылары аптасына 5 күн оқу үшін үшінші ауысымның кестесін жылжытуға тура келді, ал соңғы сабақтар енді сағат 19.50-де аяқталады. Қыста бұл балалар үшін үлкен проблема тудырады. Осыған байланысты, сабақтың аяқталу уақытын жылжыту үшін ата-аналар мектептердегі 15 минуттық ұзақ үзілісті қысқартуды сұрады. Олар санитариялық-эпидемиологиялық қызметтің кеңесі бойынша оқу процесіне енгізілген, бірақ бұл кеңестік сипатта.

- Қазіргі уақытта қалалық білім бөлімімен бірлесе отырып, санитариялық-эпидемиологиялық бақылау департаментіне оқу уақытын оңтайландыру мақсатында үлкен үзілісті қысқарту туралы өтінішпен хат дайындап жатырмыз, - деді Г.Сәдуақасова.

– Мұғалімдер үшін алты күндік жұмыс аптасы «енді мұғалімдер аптасына 5 күн жұмыс істейтін болады» деп мәлімдеген Білім министрі Асхат АЙМАҒАМБЕТОВТІҢ сөзімен қалай астасады? – деп сұрады ата-аналар.

– Республикалық тамыз конференциясы аясында өткен пленарлық отырыста оқу-ағарту министрі жаңа оқу жылынан бастап үш ауысымда оқитын мектептерді қоспағанда, бүкіл мектеп бес күндік жұмыс кестесіне көшу керектігін айтты. Ол қазіргі уақытта бұл мәселені шешу мүмкін емес екенін біледі, уақыт керек, - деді Г.Сәдуақасова.

Зульфия ИСКАЛИЕВА

Суреттер мен бейнежазбаны түсірген автор