29 тамызда әлеуметтік желіде Атырау облысының аумағындағы Каспий теңізінде балықтың, негізінен кефаль балығының жаппай қырылып жатқаны туралы видео пайда болды. Өңірлік коммуникациялар қызметінің хабарлауынша, Каспий жағалауын зерттеуге жедел түрде Жайық-Каспий бассейндік балық шаруашылығы инспекциясының қызметкерлері жіберілген.
Олар автомобиль және әуе көлігін пайдалана отырып, бақыланатын акваторияны тексеріп, 1 қыркүйекте Каспий теңізінің солтүстік-шығыс бөлігінде, Жылыой ауданы «Жилая коса» учаскесіне жақын жерде, жағалаудан 4 шақырым қашықтықтан балық өлген жерді анықтады.
– 2 қыркүйекте экология және полиция департаменттері, ветеринарлық қызметтер мен жергілікті атқарушы органдардың қызметкерлерінен құралған жұмыс тобы сол жерге барып, судан, топырақтан және өлген балықтан сынама алды. Қазір сараптама қорытындысы күтілуде, - деп хабарлады ӨКҚ.
Сондай-ақ «Қазгидрометтің» мәліметі бойынша, 18-23 тамыз аралығында Каспий теңізінде қума жел құбылысы байқалды, яғни су деңгейі төмендеген. Ойпат жерлердегі балық кері шыға алмай қалған. Алдын ала оқиға себебі осы.
Дайындаған Айнұр САПАРОВА