Алғашқы өнім халық игілігіне

Махамбет ауданында піскен қауын, қарбыздың алғашқы өнімдерін жинай бастады.

Облыста алғашқылардың бірі болып Таңдай ауылы алқабында "Медеуов К." ШҚ-да қарбыздың алғашқы өнімі жиналған болатын. Бұл ерте жетіліп пісетін "SarmatF1" тұқымынан алынған өнімдер.

- Бастысы нитраты жоқ, таза өнім. 6 гектарға қарбыз ектік. Өнім жинау басталып кетті. Оншақты адам жұмыс жасап жатыр. "Дина" базарында қарбыздың келісін 150 теңгеден сатып жатырмыз. Тез өтіп кетеді, - дейді ШҚ басшысы Қуаныш МЕДЕУОВ.

Ал "Дастан" ШҚ "Дакара" сортты ерте жетіліп тез пісетін қауындарын базарға жөнелтіп жатыр. Дәмі тіл үйіреді.

- Жалпы ауданда 100 шаруа қожалығы көкөніс өсірумен айналысады. Оларға мемлекет тарапынан зор қолдау көрсетіліп келеді, - дейді аудандық ауыл шаруашылығы бөлімнің басшысы Олжас МЫРЗАБАЕВ. - Егер шаруа тыңайтқыш, тамшылатып суару құрылғыларын сатып алса, 50 пайызына субсидия беріледі. Ал трактор сатып алса, 25 пайызын субсидия негізінде мемлекет өтеп береді.

Ләззат ҚАРАЖАНОВА

Суреттерді түсірген автор