ӨКҚ-де Атырау облысы ПД Есірткі қылмысына қарсы күрес басқармасы бастығының орынбасары Роман ЕРМҰХАНОВТЫҢ қатысуымен брифинг өтті. Оның айтуынша, «Дәрмек» жедел-профилактикалық іс-шарасы кезінде 5 мыңға жуық «Трамадол» және «Тропикамед» дәрі-дәрмектері тәркіленіп, әкімшілік хаттамалар толтырылған.
Осы жылдың бірінші тоқсанында заңсыз айналымнан 7 келіден астам есірткі тәркіленсе, оның 1 келіден астамы синтетикалық есірткі. 25 адам қылмыстық жауапкершілікке тартылып, оның 19-ы бас бостандығынан айырылды. Ермұханов бір граммнан асатын синтетикалық есірткінің аса ірі мөлшер екенін, бұл үшін нақты мерзімдер қарастырылғанын атап өтті. Бүгінде облыстық наркологиялық диспансерде 508 адам есепте тұрса, оның 19-ы әйелдер, біреуі кәмелетке толмаған.
- Бұл көрсеткіштерді азайту және өңірде есірткі саудасын болдырмау үшін көптеген іс-шаралар өтуде. Атап айтқанда, есірткі қылмысына қарсы іс-қимыл басқармасы мен облыс аумағында учаскелік полиция инспекторларының қатысуымен төрт профилактикалық іс-шара өткізілді. Нәтижесінде, есірткіні сататын интернет-сайттарды жарнамалайтын 150 графитти жазба жойылды, - деді Р.Ермұханов.
Оның айтуынша, өңірімізде маусым айында Есірткімен күрес күніне орай жастар арасында спорттық шаралар, шығармашылық байқаулар, семинар-тренингтер ұйымдастырылған.
Дайындаған Айнұр САПАРОВА