Нәрестені құлатып алған перзентханада бас дәрігер қызметінен кетті

Атырау облыстық перинаталдық орталығы директорының міндетін атқарушы Қазбек ЕРМАҒАМБЕТОВ өз еркімен қызметінен кетті. Бұған кеше осы емдеу мекемесінде орын алған дүниеге жаңа келген нәрестеге қатысты оқиға себеп болған.

– Ол басшылық қызметтен кетуге арыз берген, бірақ сол перзентханада жұмыста қалды, – дейді облыстық денсаулық сақтау басқармасы басшысының орынбасары Жанар САДУОВА. Оқиға қалай болғанын еске сала кетейік. Баланың анасын басқа да жаңа босанған аналармен бірге рентгенге шақырады. Ал баланың қасында өзі жаңа босанып, әзер қозғалып, әлі қол-аяғын жинап үлгермеген келіншек қалады. Бала қатты жылай бастағанда әйел оны қолына алып, жұбатуға тырысады. Өзі әлсірей бастағанын сезіп, медбике мен дәрігерді көмекке шақырады. Оның дауыстап шақырғанына ешкім келмейді. Бір кезде әлі кеткен әйел, баланы еденге құлатып алады.

Ж.Садуованың айтуынша, зардап шеккен нәресте жансақтау бөліміне жатқызылып, жан-жақты тексеріліп, УДЗ және КТ жасалды.

– Бала мен анасы әлі орталықта жатыр, бірақ жансақтау бөлімшесінде емес, жаңа туған нәрестелерге арналған патология бөлімшесінде. Балада гипоксиялық-ишемиялық зақымдану бар, бірақ ол құлатып алғаннан емес, жүктілік пен босану кезеңіне байланысты, - дейді Ж.Садуова.

Денсаулық сақтау басқармасындағы жұмыс комиссиясының тексеру қорытындысы бойынша дәрігер мен кезекшіліктегі медицина қызметкерлеріне тәртіптік жаза қолданылды.

Зульфия ИСКАЛИЕВА