Атырау, 4 желтоқсан 18:18
 ашықВ Атырау +1
$ 436.29
€ 492.83
₽ 5.92

Бұл жолы премьер Астрахань жолына ғана көңіл бөлді

1 218 просмотра

Бүгін, 21 қазанда ҚР Премьер-Министрі Асқар Мамин өңірімізге жұмыс сапарымен келді. Бұл Ақтөбе - Атырау - Астрахань тас жолын реконструкциялау барысын тексеру үшін Ақтөбе мен Атырау облыстарына тексеру жүргізу сапары болды.

Жазда келген сапарынан айырмашылығы ол қалаға кірген жоқ. Жұмыс сапарының бағдарламасына да бұдан өзге ештеңе енгізілмеді, деп жауап берді Премьер -Министрдің баспасөз қызметі. Содан кейін жолды реконструкциялау туралы осы сапардың баспасөз хабарламасына сілтеме жасады. Басқа ақпарат жоқ.

Баспасөз хабарламасының мәтіні:

«Автожолдың жалпы ұзындығы 897 шақырымды құрайды, оның ішінде Ақтөбе облысы бойынша – 311 км, Атырау облысы бойынша – 586 км. 2015 жылы «Атырау – Мақат» учаскесінің 164 шақырымы қайта салынды.

Қазіргі таңда «Ақтөбе – Қандыағаш», «Қандыағаш – Мақат», «Атырау – РФ шекарасы» учаскелеріндегі автожолдың 733 шақырымында реконструкциялау жұмыстары жүргізіліп жатыр. «Ақтөбе – Қандыағаш» учаскесі (96 км) 4 жолақты қозғалысы бар I санатты 78 км жолды және 2 жолақты қозғалысы бар II санатты Қандыағаш қаласын айналып өтетін 18 шақырым жолды қамтиды. Жыл соңына дейін мұнда 18 шақырымды жаңа жол төсемімен қамтамасыз ету жоспарланған.

«Қандыағаш – Мақат» учаскесінде (360 км) асфальтбетон төсеу және жолды абаттандыру бойынша соңғы жұмыстар жүргізіліп жатыр. 2021 жылы жаңа жабынмен учаскенің барлық ұзындығы бойынша қозғалысты толық қамтамасыз ету көзделген. Бұл ретте Ақтөбе қаласынан Атырау қаласына дейінгі жол екі есе қысқарады – бұрын Ақтөбе-Атырау учаскесінің қанағаттандырарлықсыз жай-күйіне байланысты жүргізушілерге көршілес өңірге Орал арқылы барып, қосымша 500 шақырымға жуық жол жүруге тура келетін.

Жалпы ұзындығы 277 шақырымға созылатын «Атырау – РФ шекарасы» учаскесі (Астрахань қаласы бағытында) 1970 жылдары осіне 8 тонна жүктемемен салынған III санаттағы республикалық маңызы бар жол болып табылады. Ауыр жүк тасымалдайтын транзиттік көлік құралдарының қозғалыс қарқындылығының артуына байланысты жолдың жағдайы нашарлап кеткен. Қайта жөндеу нәтижесінде жыл соңына дейін 92 шақырым жолда қозғалыс қамтамасыз етіледі, қалған 185 шақырым жолда жер төсемі төселіп, жол төсемінің, көпірлер мен құбырлардың құрылымдық қабаттары салынып жатыр. Жұмыстарды 2022 жылы аяқтау жоспарлануда.

2021 жылы Қазақстанда 8,4 мың шақырым автожол, оның ішінде республикалық маңызы бар 5 мың шақырым, жергілікті желі 3,4 мың шақырым жол құрылыс және қайта жаңарту жұмыстарымен қамтылды. Жол-құрылыс жұмыстарына 200 мыңға жуық адам тартылған. Биыл елімізде 5,1 мың шақырым жолда жұмыстар аяқталатын болады. Қалған жұмыс көлемі ауыспалы және 2022 жылы орындалады».

Дайындаған Айнұр САПАРОВА

Премьер-Министрдің баспасөз қызметінен алынған суреттер

21 қазан, 21:12

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 707 37 300 37 нөміріне және editors@azh.kz поштасына жібере аласыз.