Театр 116 миллионға «құпия» келісімшартқа отырған

Атырау облыстық драма театрындағы мемлекеттік сатып алуға қатысты хикая едәуір резонанс тудырды. Әңгіме қомақты қаржы туралы болып отыр.

Театр мемлекеттік сатып алу порталында тендер жарияламай-ақ, Наурыз мейрамына, Қазақстан халқының бірлігі күніне және Халықаралық театр күніне арналған іс-шаралар өткізген. «ARSEN» ЖК мердігер компаниясы порталда мамырда ғана тіркелді, ал онымен келісімшарт кейінгі уақытпен, осы жылдың қыркүйегінде ғана жарияланды.

- Бұл мемлекеттік сатып алуға жауапты біздің маманның қателігі, ол тәртіптік жазаға тартылды. 10 наурызда театр «ARSEN» ЖК-мен 116 миллион 300 мың теңге сомаға келісімшарт жасады. Ақша наурыз, мамыр және маусым айларында орындалған жұмыс актісі бойынша төленді. Бірақ бұған дейін мұндай жағдайда талап етілетін бүкіл процедура сақталмады, - дейді театр директоры Берік ЖӘМЕНОВ. Оның айтуынша, бүгінде 54 миллион 850 мың теңге игерілген.

Облыстық мәдениет басқармасының басшысы Ақылбек РЫСҚАЛИЕВТІҢ айтуынша, осы фактіні жан-жақты тексеру үшін арнайы жұмыс тобы құрылған.

Айнұр САПАРОВА