Наурыз екі айдан кейін өлі табылды

Ақпан айының басында жоғалып кеткен қала маңындағы Талғайраң ауылының 29 жастағы тұрғыны Наурыз ӘЙТЕКЕШОВ 17 сәуірде өлі күйінде табылды. Бұл туралы Атырау облыстық полиция департаментінің баспасөз қызметінің жетекшісі Мейірім ЕРДАУЛЕТ хабарлады.

Оның денесін «Жанәділ» шаруа қожалығының қызметкерлері вагон контейнерінен тапты.

- Сыртынан қарағанда зорлық-зомбылық іздері табылған жоқ, денесі мәйітханаға сараптамаға жіберілді, - деп хабарлады ПД баспасөз қызметі.

Естеріңізге сала кетсек, Наурыз 5 ақпанда үйден шығып кетіп, кері оралмады. Оны іздеуге полиция, құтқарушылар кірісіп, еріктілер де көмекке келді.  

Наурыз Әйтекешов – Қарабатан станциясынан Талғайранға көшіп келіп, осы жерде қоныс тепкен отбасындағы 9 баланың төртіншісі. Осыдан бірнеше жыл бұрын осы баланың психикасына зақым келіп, арасында басы ауған бағытқа кетіп қалатын болған, бірақ ол кейін табылып жүрді.

Айнұр САПАРОВА