Мұнай іздеу құқығын кім сатып алды

Энергетика министрлігі көмірсутегі кен орындарын барлау және өндіру құқығы бойынша электронды аукционның жеңімпаздарын жариялады.

Құны жоғары Сарайшық пен Забурындағы (сәйкесінше 43 және 16 миллиард теңге) учаскелер «Petro Qazaq» ЖШС-не сатылды. Kazservice мәліметтері бойынша, «Petro Qazaq» ЖШС құрылтайшысы - Гаагада (Нидерланды) тіркелген оффшорлық Winsple Netherlands B.V. компаниясы. Қалған 5 учаске қазақстандық инвесторларға тиесілі.

Бегайдар мен Қошалақты бұрын мұнай және газ өндіру саласында болмаған «SapaInvestment» ЖШС пайдаланады. Kazservice хабарлағандай, «SapaInvestment» құрылтайшысы - Санжар Омаров (негізгі бенефициарлар - Санжар Омаров пен Дамир Балтабаев).

Сағыз учаскесінде «TUMAR PETROL» ЖШС барлау жүргізеді, оның құрылтайшысы - Тәтішевтер отбасына тиесілі KUSTO OIL PTE.LTD компаниясы.

Қарабау мен Балқұдық учаскелері «Қарабау Петролеум» және «Балқұдық Мұнай» компанияларына сатылды. Бұл компаниялар «Қарамаржан Ойл энд Газ» ЖШС және «СТК-Групп проект» ЖШС арқылы Сейітжановтар отбасына тиесілі.

Дайындаған Нұргүл ХАЙРУЛЛИНА