В Атырау 0 
Білім министрлігінің мектеп бітірушілердің лимузин жалдап, қызыл кілемге тапсырыс беруіне тыйым салуға қауқары жоқ. Бүгін вице-министр Бибігүл Асылова түлектердің бітіру кешін шабылып өткізуін ата-аналарының қалауына қалдырамыз деді.
Түлектердің бітіру кешіне білім министрлігі қанша тыйым салдық десе де, жастар жыл сайын сән салтанатпен өткізіп жатады. Түлектер ата-анасының қалтасын қақса да, қымбат кортеж жалдап, сәнді киінуге тырысады. Салонға барып әрленіп, барынша шабылып өткізу соңғы жылдары заңды құбылысқа айналған. Ал, қалтасы таяздау ата-аналар қанша қынжылса да, баласын қатарынан қалтырғысы келмей қалағанын орындауға тырысады. Бітіру кешінің осынша шығынмен өтуін білім министрлігі де қалап отырған жоқ. Вице-министр "мектепте ақша жинауға тыйым салынғанын, ата-аналарға түсіндіргендерін" айтады. Тіпті, түлектердің бітіру кеші тек мектепте ғана өтуін қадағалауды директорлардың құлағына құйып қойыпты. Бірақ, ата-аналар комитеті мектептен тыс жерде салтанатты кеш ұйымдастырса оған тыйым салуға министрліктің де құзыры жүрмейді екен.
БИБІГҮЛ АСЫЛОВА, ҚР Біілім және ғылым вице-министрі:
- Бітіру кештері мектептің ішінде өтуі тиіс. Ал, басқа жерде өткізуді ата-аналар комитеті өздері шешіп жатады. Министрлік ақша жинау, қымбат дүниелерді жалға алу сияқты идеяларды қолдамайды. Бірақ, тыйым да сала алмаймыз.
Дереккөз: 31 арна