Қазақстан Риодағы Паралимпиада ойындарын екі медальмен аяқтады

Жексенбі күні Бразилияда XV Паралимпиада ойындарының салтанатты жабылу рәсімі өтті,- деп хабарлады Қазақпарат.

Бразилиялықтардың музыкаға деген сүйіспеншілігіне арналған салтанатты шара Ойындардың ресми ашылуы болған "Маракана" стадионында өтті.

Шараға қатысушылар ойындар кезінде қаза тапқан ирандық велоспортшы Бахман Голбарнежадты еске алды.

Еске салайық, 2016 жылғы Паралимпиада ойындары 7-18 қыркүйек күндері Рио-де-Жанейрода өтті. Жалпы командалық есепте бірінші орынды 107 алтын, 81 күміс және 51 қолаға қол жеткізген Қытай иеленсе, 64 алтын, 39 күміс және 44 қола жүлдеге ие болған Ұлыбритания спортшылары екінші орыннан көрінді. Үздік үштікті 41 «алтын», 37 «күміс» және 39 «қоламен» Украина құрамасы түйіндеді.

Қазақстандық спортшылар бұл бәсекеде екі медальға қол жеткізді.

Мәселен, Зүлфия Ғабидуллина жарыстардың алғашқы күнінде-ақ еркін стильде 100 метрге жүзуде әлемдік рекордты орната отырып, «алтын» иеленсе, пауэрлифтинг бойынша спортшы Раушан Қойшыбаева күміс жүлдегер атанды. Жалпы есепте Қазақстан Словениямен бірге 58-інші орынға тұрақтады.

Дереккөз: Іnform.kz