Алматыдағы терактіден жарақат алған тағы екі полицей қайтыс болды

Фото: ІІД баспасөз қызметі

Алматыдағы терактіден жарақат алған тағы екі полицей қаза тапты, - деп хабарлайды Tengrinews.kz тілшісі қалалық ІІД баспасөз қызметіне сілтеме жасап.

"Алматы қаласының жедел жәрдем ауруханасының жансақтау бөлімінде Күлекбаевтың заңға қайшы әрекеттеріне қарсылық көрсету кезінде жарақат алған екі полиция қызметкері қайтыс болды. Дәрігерлер оларды соңына дейін құтқаруға тырысты. Өкінішке қарай, жарақаттары ауыр болды", - деп хабарлады ІІД өкілдері.

Олар полиция сержанты Әбілдаев Серік Еркенұлы, 1973 жылғы, Алматы қалалық ІІД Жергілік полиция қызметінің жол-патрульдік полкінің полицейі, ішкі істер органдарында 1994 жылдан бері қызмет еткен. Үйленген, артында үш қызы қалды.

Полиция лейтенанты Рахматуллаев Мейрамбек Нуридиллаұлы, 1992 жылғы, Алмалы аудандық ІІБ учаскелік инспекторы, ішкі істер органдарында 2012 жылдан бері қызмет еткен. Қызмет барысында ҚР ІІМ және Алматы қалалық ІІД алғыс хаттарымен бірнеше рет марапатталған. Үйленген.

"Алматы қалалық ІІД жеке құрамы, басшылығы және Ардагерлер кеңесі Серік Әбілдаев пен Мейрамбек Рахматуллаевтың қазасына байланысты олардың туыстары мен жақындарына көңіл айтады", - делінген хабарламада.

Еске салайық, 18 шілдеде Алматыда террористік акт болған еді. Белгісіз ер адам Алмалы аудандық ІІБ мен ҰҚК департаментіне қарулы шабуыл жасады. Оқиға салдарынан алты адам, оның ішінде төрт полиция қызметкері қаза тапты. Қалада террорлық қатердің қызыл деңгейі жарияланды. Қылмыскер ұсталды, ол бұрын істі болған Қызылорда облысының тумасы Руслан Күлекбаев болып шықты.

Дереккөз: Tengrinews.kz