В Атырау
+3 
Астана қаласында сот азаматтық белсенді Мақсат Ілиясұлын 17 мамыр күні кешке 10 тәулікке қамау жөнінде шешім шығарды. Соның алдында белсендіні әкімшілік полиция өкілдері алып кеткені айтылды,- деп хабарлады Азаттық.
Оған "рұқсат етілмеген наразылық акциясына шақырды" деген айып тағылған. Бұл туралы белсендінің жұбайы Мәдина Азаттыққа хабарлады. Оның айтуынша, Мақсат Ілиясұлына қарсы қылмыстық іс қозғалған. Әзірге бұдан басқа мәлімет хабарланбаған.
Жер реформасы туралы республикалық комиссия мүшелігіне алынып, оның алғашқы отырысына қатысқан белсенді соңынан комиссия жұмысынан бас тартқан еді.
16, 17 мамыр күндері Қазақстанның бірнеше қаласында басқа да азаматтық белсенділерге ескерту жасалып, олардың кейбірін полиция ұстаған.
Жер мәселесіне қарсы наразылық күшейгеннен кейін Қазақстан президенті Нұрсұлтан Назарбаев 5 мамырда жерді жекешелендіруге және шетелдіктерге ұзақ мерзімге жалға беруге мораторий жариялаған. Алайда әуелгі 21 мамырда жер реформасына қарсы митингі ұйымдастыру бастамасы сонда да талқыланып келеді. Билік болса, "арандатуға баратындарды" жазалау керектігін мәлімдеген.
Дереккөз: Аzattyq.org