Қазақстанда вокзал қызметкерлері мүгедектердің жүгін вагонға дейін жеткізіп беруге міндеттелді

Вокзал қызметкерлері мүгедектердің жүгін вагондарға дейін жеткізуге міндетті, - деп хабарлады "Алматы" телеарнасы.

Телеарнаның мәліметінше, "Қазақстан темір жолы" Ұлттық компаниясы мүмкіндігі шектеулі жандарға қызмет көрсету ережесін бекітті. Жаңа тәртіп бойынша, вокзал қызметкерлері жарымжан жолаушыларды күтіп алып, жүгін вагондарға дейін жеткізетін болады.

"Сонымен қатар, олардың міндетіне кембағалдарды отырғызуға көмектесу қызметтері енгізілді. Ол үшін вокзал кезекшісіне мүгедек азаматтың келетіндігі туралы алдын ала хабарлануы тиіс", - деп хабарланды.

Қазіргі таңда еліміздегі 138 теміржол вокзалында пандустар талапқа сай орнатылған. 58 нысанда мүгедектерге арналған арбалар да алынған. 16 вокзалдағы анықтама бюролары құлағының мүкісі бар жандарға қажетті ақпараттық жүйемен қамтылды.

Дереккөз: tengrinews.kz