Жақсыбеков Сергей Кулагиннің ұлын Астанада аудан әкімі етіп тағайындады

Астана әкімі Әділбек Жақсыбеков «Алматы» және «Сарыарқа» аудандарының әкім аппараттарына жаңа әкімдерді таныстырды, деп хабарлайды astana.gov.kz.

Бүгін қалалық мәслихаттың кезектен тыс сессиясында депутаттар «Алматы» және «Сарыарқа» аудандарының жаңа әкімдері қызметіне ұсынылған Ермағанбет Қабдулаұлы Бөлекпаев пен Павел Сергеевич Кулагиннің кандидатураларын бірауыздан қолдады.

Әділбек Жақсыбеков екі әкім де еңбек жолында өздерін жақсы жағынан көрсете білген, түрлі лауазымдарды атқаруда тәжірибелері мол екендігін айтты.

Ермағанбет Бөлекпаев бұған дейін Сарыарқа ауданының әкімі қызметін, оған дейін Мемлекеттік қызмет істері жөніндегі агенттік жүйесінде, Қарағанды және Оңтүстік Қазақстан облыстарында Агенттіктің аумақтық басқармаларында басшы, Астана қаласы Тәртіптік кеңесінің төрағасы қызметтерін атқарған.

Павел Кулагин бұған дейін Астана қаласының Коммуналдық шаруашылық басқармасының басшысы, «Алматы» ауданының әкімі қызметтерін атқарған.

Жақсыбеков сондай-ақ, аудандық әкімдіктер ұжымдарына алдағы кезеңге міндеттерді белгілеп берді.

Дереккөз: nur.kz