Айырбас бағамының күрт және тұрақсыздыққа әкелетін өзгерістеріне жол берілмейді - Ақышев

АСТАНА. ҚазАқпарат - Айырбас бағамының күрт және тұрақсыздыққа әкелетін өзгерістеріне жол берілмейді. Бүгін Парламент Мәжілісінің жалпы отырысында ҚР Ұлттық Банкінің төрағасы Данияр Ақышев осылай мәлім етті. Еске сала кетейік, жалпы отырыста «2015-2017 жылдарға арналған республикалық бюджет туралы» заңына өзгерістер мен толықтырулар енгізу туралы» заң жобасы талқыланған болатын.

«Қазіргі уақытта валюта нарығындағы ахуал тұрақты. Ұлттық банк валюта нарығына қатысуын барынша азайтты. Валюта нарығында қалыптасқан баланс Қазақстан экономикасына әсер ететін іргелі факторларға сәйкес келеді. Бұлар: мұнайдың әлемдік бағасы, ресей рублінің бағамы, Ресей және Қытай экономикаларындағы ахуал, әлемдік валюталар бағамдарының анықтамасы», - деді ҰБ Төрағасы.

Оның айтуынша, бұдан әрі де аталған іргелі факторлар ескерілетін болады. «Сонымен қатар, ҰБ айырбас бағамының күрт және тұрақсыздыққа әкелетін өзгерістеріне жол бермейтін болады», - деді бас банкир.

Дереккөз: inform.kz