Бойжеткен кассир мен оны соққыға жыққан Қуаныш Төрекелдиев бітімге келді

АСТАНА. ҚазАқпарат - Қуаныш Төрекелдиевке қатысты сот алдындағы тергеу тараптардың бітімге келуіне байланысты тоқтатылды, деп хабарлады Астана қ. Ішкі істер департаментінің баспасөз қызметінен.

«Қуаныш Төрекелдиевке қатысты сот алдындағы тергеу тараптардың ҚР ҚК 68-бабына сәйкес келісуіне (татуласуына) байланысты тоқтатылды», - делінген хабарламада.

Еске сала кетейік, аты шулы оқиға елордалық «Сарыарқа» СОСО-дағы «Кинопарк» кинотеатрында орын алды. Кассирмен арада дау туғандықтан, жігіт оған салқын судың ыдысын лақтырып, кейін қызды тепкінің астына алған. Полиция бұзақыны сол күні ұстады. Бұл 22 жастағы Астана тұрғыны Қуаныш Төрекелдиев екені анықталды.

Желіде оқиға бейнеленген видео жарияланды. Ролик пайдаланушылар арасында үлкен наразылық тудырып, тез тарап кетті.

Күдіктіге қатысты ҚР ҚК 293-бабы бойынша сот алдындағы тергеу басталған еді.

Дереккөз: inform.kz