Айымбетов ғарышта Арал және Каспий теңіздеріне мониторинг жүргізді

АСТАНА. ҚазАқпарат - Бүгін Ақордада ғарышкер Айдын Айымбетов Елбасы Нұрсұлтан Назарбаевқа ғарышқа сапары барысында жүргізген ғылыми-зерттеу жұмыстары жайында баяндады.

«Құрметті Нұрсұлтан Әбішұлы, Сіз жүктеген міндеттердің орындалуы туралы баяндауға рұқсат етіңіз. Қыркүйектің 2-сі мен 12-сі аралығындағы ғарышқа сапарым барысында Қазақстанның ғарышты зерттеу бағдарламалары жүзеге асырылды. Қазғарыштың ғылыми бағдарламасы бойынша Арал және Каспий теңіздеріне мониторинг жүргізілді. Микрогравитация барысында микробөлшектердің физикалық ерекшеліктеріне зерттеулер жүргізілді», - деді ол.

Оның атап өтуінше, аталған шаралар отандық ғалымдардың термоядролық энергетика, медицина, нано-технология және тамақ өнеркәсібі салаларындағы зерттеулерінде кәдеге жарайтын болады. «Бұл зерттеулер Қазғарышта, сонымен бірге халықаралық ғарыш ынтымақтастығы аясында одан әрі жалғасын табады», - деді ғарышкер.

Дереккөз: inform.kz