Жалға алушыларды тіркеу пәтерден айырылуға әкеле ме

NUR.KZ сайтының хабарлауынша, Қазақстандағы көптеген жылжымайтын мүлік иелері жалға алушыларды уақытша тіркеуге қоюдан қауіптенеді. Олар баспанадағы үлесінен айырылып қалудан немесе кейін жалға алушыларды тіркеуден шығару қиынға соғуынан қорқады. Алайда заңгерлер мен жылжымайтын мүлік нарығының сарапшылары бұл қауіптердің негізсіз екенін атап өтеді.

Тіркеу баспанаға құқық бере ме?

Тұрғылықты жері бойынша тіркеудің меншік құқығына ешқандай қатысы жоқ. Тіркеу жалға алушыны пәтердің ортақ иесіне айналдырмайды, оған баспанадан үлес бермейді және меншік иесінің құқықтарын шектемейді.

Пәтер иесі жылжымайтын мүлкін сатуға, сыйға тартуға немесе кепілге қоюға толық құқылы. Сонымен қатар меншік иесі кез келген уақытта басқа адамның келісімінсіз оны тіркеуден шығара алады.

Жалға алушыға тіркеу не үшін қажет және ол неліктен міндетті?

Уақытша тіркеу жалға алушыларға әлеуметтік және мемлекеттік қызметтерді алу үшін қажет. Мысалы, балаларды мектепке немесе балабақшаға орналастыру, сондай-ақ жергілікті емханаға тіркелу үшін керек.

Сонымен қатар заң тұрғын үй иесін жалға алушыларды тіркеуге міндеттейді. Уақытша тіркеу бір айдан бір жылға дейінгі мерзімге рәсімделеді. Бұл ретте азаматтың бұрынғы мекенжайындағы тұрақты тіркеуі сақталады. Егер тіркеу мерзімі аяқталғанымен, адам пәтерде тұруын жалғастырса, тіркеуді қайта рәсімдеу қажет.

Алматы мен Астанада тіркеу талаптары мен айыппұлдар қандай?

Уақытша тіркеусіз тұру үшін әкімшілік айыппұлдар қарастырылған.

• Тұрғын үй иесіне: 10 АЕК (43 250 теңге), ал бір жыл ішінде қайталанған жағдайда — 20 АЕК (86 500 теңге). Тұрғындардың көшіп кеткені туралы хабарламағаны үшін 5 АЕК (21 625 теңге) айыппұл салынады.
• Жалға алушыға: 7 АЕК (30 275 теңге), ал қайталанған жағдайда — 13 АЕК (56 225 теңге).

Маңызды: Астана мен Алматыда тұрғын үйдің ауданына қатысты талап бар. Тіркелген әр адамға пәтердің жалпы ауданының кемінде 15 шаршы метрі тиесілі болуы керек. Мысалы, ауданы 30 шаршы метр болатын бір бөлмелі пәтерге екі адамнан артық тіркеуге рұқсат етілмейді.

Уақытша тіркеуді онлайн қалай рәсімдеуге болады?

Рәсімдеу шамамен 15 минут уақыт алады және eGov.kz, eGov Mobile немесе банк қосымшалары арқылы тегін жүргізіледі.

1. Жалға алушы уақытша тіркеуге өтініш беріп, меншік иесінің ЖСН-ін және тіркеу мерзімін көрсетеді.
2. Тұрғын үй иесіне хабарлама келіп, ол тіркеуге келісімін растайды.
3. Екі тарап та өтінішке электрондық цифрлық қолтаңба (ЭЦҚ) арқылы қол қояды.