Зейнетке мерзімінен бұрын шығу: Қазақстанда зейнетақы аннуитетінің үлгілік шарты өзгертілді

2026 жылғы 16 қазаннан бастап Қазақстанда зейнетақы аннуитетінің үлгілік шартына енгізілген өзгерістер күшіне енеді. ҚР Қаржы нарығын реттеу және дамыту агенттігі (ҚНРДА) ақша көздеріне, мұрагерлерге төленетін қаражатқа қатысты талаптарды нақтылап, сондай-ақ төлемдерді кешіктірген сақтандыру компанияларының жауапкершілігін күшейтті, деп хабарлайды uchet.kz.

1. Ақшаның үш көзі және өз қаражатынан қосымша төлем

Енді шартта сақтандыру сыйлықақысы қалыптастырылатын үш қаражат көзі нақты көрсетіледі:

• БЖЗҚ-дағы зейнетақы жинақтары;
• басқа сақтандыру компаниясынан алынатын сатып алу сомасы (ауысқан жағдайда);
• сақтанушының өз қаражаты.

Егер БЖЗҚ-дағы жинақ аннуитетті рәсімдеуге жеткіліксіз болса, азамат жетіспейтін соманы өз қаражатынан толықтыра алады. Мұны бір реттік төлеммен және толық көлемде жасау қажет.

2. Мұрагерлерге не қалады?

Құжатта аннуитет алушы қайтыс болған жағдайда оның отбасы мүшелеріне берілетін кепілдіктер егжей-тегжейлі жазылған:

• Жерлеуге берілетін төлем: отбасы мүшелеріне немесе жерлеуді ұйымдастырған адамға сақтандыру компаниясы кемінде 35 АЕК мөлшерінде біржолғы төлем төлеуге міндетті (әр сақтанушы бойынша).
• Алынбаған кепілді төлемдер: егер сақтандырылған адам кепілдендірілген төлемдердің толық көлемін алып үлгермей қайтыс болса, қалған қаражат шартта көрсетілген тұлғаларға немесе мұрагерлерге беріледі. Олар ақшаны бірден толық көлемде алуды немесе ай сайынғы төлем түрінде алуды таңдай алады.
• Алғашқы төлемге дейін қайтыс болған жағдайда: егер адам алғашқы төлемдер басталғанға дейін қайтыс болса, мұрагерлерге арнайы есеп бойынша сатып алу сомасы толық көлемде біржолғы төлем ретінде беріледі.

3. Төлемді кешіктіргені үшін күніне 1,5% өсімпұл

Сақтандыру компанияларына қатаң қаржылық санкциялар енгізіледі: аннуитеттік төлемді әр кешіктірген күн үшін сақтандырушы төленбеген соманың 1,5% мөлшерінде өсімпұл төлеуге міндетті. Өсімпұлдың ең жоғары мөлшері берешек сомасының 50%-ымен шектеледі.

4. Сақтандырушылар үшін жаңа мерзімдер мен міндеттер

• Хабарлама: БЖЗҚ-дан қаражат түскені туралы компания клиентке 5 жұмыс күні ішінде жазбаша хабарлауға міндетті.
• Басқа компанияға ауысу: егер клиент сақтандыру компаниясын ауыстыру туралы шешім қабылдаса, бұрынғы компания сатып алу сомасын жаңа операторға 10 жұмыс күні ішінде аударуы тиіс.
• Ақшаны БЖЗҚ-ға қайтару: егер азамат төлем мөлшерін азайтып, қаражаттың бір бөлігін БЖЗҚ-ға қайтару туралы өтініш берсе, сақтандырушы ақшаны қорға 20 күнтізбелік күн ішінде аударуға міндетті.

5. Алушылар үшін маңызды шарт

Сақтанушылар өздерінің дербес деректері немесе банк деректемелері өзгерген жағдайда бұл туралы 10 күн ішінде хабарлауға міндетті.

Маңызды: егер клиент шот нөмірінің өзгергені туралы компанияға уақытында хабарламаса, дұрыс деректемелер нақтыланғанға дейін ай сайынғы төлемдер автоматты түрде тоқтатылады.