В Атырау +16.2 
Қостанай қалалық соты жолда беті ашық қалған құдыққа тап болып, көлігін зақымдап алған тұрғынның талап арызын қанағаттандырды. Сот шешімімен қала әкімдігінің құрылыс бөлімі автокөлік иесіне келтірілген шығынды өтейтін болды.
Оқиға былтыр қазан айында Береке шағын ауданында болған. Жолдың жүріс бөлігіндегі ашық құдыққа соғылған Chevrolet автокөлігі механикалық зақым алған. Бұған дейін де әкімдіктің құрылыс бөлімі құдықтарды тиісті деңгейде күтіп-ұстамағаны үшін әкімшілік жауапкершілікке тартылған еді.
Сот талқылауы кезінде әкімдік өкілі талап арызбен келіспей, нысанда құрылыс жұмыстары әлі аяқталмағанын алға тартты. Жауапкердың пікірінше, жолдағы қауіпсіздікке мердігер компания жауап беруі тиіс болған. Алайда сот бұл уәжді негізсіз деп тапты. Құдық ресми түрде құрылыс бөлімінің жауапты пайдалануында болған, ал мекеме өкілдері кінәлі емес екенін дәлелдейтін дәйектер ұсына алмады.
Сот шешіміне сәйкес, мемлекеттік мекемеден автокөлік иесінің пайдасына 205 400 теңге материалдық залал және бағалау сараптамасына жұмсалған 85 000 теңге өндірілді.