В Атырау +14.7 
Семейдегі университеттердің бірінің алты студенті ауқымды қаржылық схемаға қатысы бар болып шықты. Олардың банк карталары Қазақстан бойынша интернет-алаяқтардың құрбандарынан ұрланған ақшаны қолма-қол ақшаға айналдыру үшін пайдаланылған.
Абай облысы бойынша ҚМА департаментінің мәліметінше, Семей қаласында ведомство қызметкерлері дропперлер деп аталатын адамдарды тартумен айналысқан топтың қызметін тоқтатты. Ұйымдастырушылар заңсыз ақша қаражатын транзиттеу және шешіп алу үшін өздерінің банк шоттарын беруге дайын адамдарды іздеген.
Құқық қорғау органдары жергілікті жоғары оқу орнының алты студентін анықтап, олардан жауап алған.
«Студенттерге тиесілі банк карталары ақша қаражатын қабылдау үшін пайдаланылған. Кейін түскен қаражат бөлшектеліп, басқа шоттарға аударылған. Бұл оның шығу тегін жасыруға, ізді шатастыруға және кейіннен ақшаны еш кедергісіз қолма-қол ақшаға айналдыруға мүмкіндік берген», — деп түсіндірді ҚМА.
Схеманың ауқымы да айтарлықтай: жауап алынған бір студенттің шотына ғана 25 азаматтан 16 миллион теңгеден астам ақша түскен.
Тергеу барысында бұл қаражатты жібергендердің интернет-алаяқтардың құрбандары екені анықталды. Алданған қазақстандықтардың географиясы бірден елдің 11 өңірін қамтиды:
Абай, Қарағанды, Ақтөбе, Түркістан, Атырау, Батыс Қазақстан, Павлодар, Ақмола, Жамбыл және Алматы облыстары;
Алматы және Шымкент қалалары.
Қазіргі уақытта тергеу жалғасып жатыр. Тергеу мүддесіне және ҚР ҚПК-нің 201-бабына сәйкес өзге ақпарат жария етілмейді.