В Атырау +24.6 
Атырауда дендропарк құруға арналған жеті жылдық, көп миллиардтық мемлекеттік қолдауы бар тендерді небәрі бес қызметкері бар компания жеңіп алды.
Атырауда дендрологиялық парк салу жоспарын жергілікті билік алғаш рет өткен жылы жариялап, Жайық өзенінің екі жағынан екі жер телімін бөлетінін хабарлаған. Оның бірі – 6 гектарлық жер Геолог ықшамауданында, ал екіншісі – 20 гектарлық жер «Атырау-2» ықшамауданында орналасқан.
Атыраудағы дендропарк өңірдегі алғашқы арнайы табиғатты қорғау, ғылыми және мәдени-ағартушылық аумақ болмақ деп жоспарлануда. Болашақта ол сирек өсімдіктерді зерттеу, көбейту және ботаникалық ізденістер жүргізу базасына айналуы мүмкін.
Жоба мемлекеттік-жекеменшік әріптестік аясында жүзеге асырылады. Жақында оның құны – 29,6 млрд теңге екені және тендер жеңімпазы ретінде «Atyrau Green Park» ЖШС анықталғаны белгілі болды.
Ашық дереккөздерде «Atyrau Green Park» ЖШС 2025 жылдың 29 шілдесінде Астанада тіркелгені көрсетілген. Негізгі қызмет түрі – жылжымайтын мүлікті сыйақы үшін немесе шарт негізінде басқару. Басшысы – Арғын Ерболатұлы Габдулин. Компания - шағын жеке кәсіпорын, штатында бес қызметкерге дейін ғана бар.
Осындай шағын ЖШС қалайша көп миллиардтық тендердің жеңімпазы атанды деген сұрақ туындайды? Таңдау қандай критерийлер бойынша жүргізілген?
«АЖ» редакциясы осы және басқа сұрақтарды Атырау облысының табиғи ресурстар және табиғат пайдалануды реттеу басқармасына жолдады. Конкурс ұйымдастырушы әрі жобаны жүзеге асырудағы мемлекеттік әріптес дәл осы басқарма еді.
Басқарма басшысының орынбасары Зарина Төребаеваның қолы қойылған ресми жауапта конкурс құжаттамасы 2026 жылғы 11 ақпанда Мемлекеттік-жекеменшік әріптестік ақпараттық жүйесінің порталында жарияланғаны көрсетілген. Екі кезеңнен тұратын тендер 2026 жылғы 7 қыркүйекке дейін жүргізілген. Оған тек бір ғана өтінім – «Atyrau Green Park» ЖШС-нен түскен, сол себепті компания жеңімпаз деп жарияланған.
Басқарма компанияның шағын штатына назар аудармағанын атап өтті. Ресми жауапта «жеңімпазды анықтау қызметкерлер санына немесе компанияның тіркелген күніне емес, қатысушының белгіленген біліктілік талаптарына, конкурс құжаттамасына және өтінімнің қаралу нәтижелеріне сәйкес жүргізілді» делінген.
Сондай-ақ басқарма ЖШС тендерге заңдық мәртебесін, қаржылық жағдайын және біліктілік талаптарына сәйкестігін растайтын барлық құжаттарды тапсырғанын мәлімдеді.
Облыс әкімдігінде бұл компанияның құрылтайшысы жеке меншік General Contractors Group Ltd екені хабарланды.
Ашық дерекқорларды талдау нәтижесінде небәрі бес қызметкері бар «Atyrau Green Park» ЖШС-нің артында General Contractors Group тұрғаны анықталды. Бұл топ ондаған компания мен жобаны біріктіреді.
General Contractors Group, атап айтқанда, «Alem Qurylys» ЖШС-нің құрылтайшысы. Бұл компания Атырауда Бейбітшілік пен достық сарайын салды, жаңа онкологиялық диспансерді тұрғызатын болады және 84,3 млрд теңгелік жаңа арнайы экономикалық аймақ – «Атырау» АЭА-ын абаттандыруға арналған жүзеге аспаған келісімшартқа қатысқан.
Өз кезегінде ашық дереккөздер General Contractors Group компаниясын BI Group холдингімен байланыстырады. Ал BI Group-тың негізін қалаушы – елдегі ең бай кәсіпкерлердің бірі Айдын Рахимбаев. Осылайша, шағын «Atyrau Green Park» ЖШС-нің артында ірі құрылыс холдингінің ықпалы көрініп тұр.
Ал дендропаркке қайта оралсақ, табиғи ресурстар және табиғат пайдалануды реттеу басқармасының деректеріне сәйкес, мемлекет тарапынан бөлінген 29,6 млрд теңгелік міндеттемелер 2033 жылға дейін есептелген. Бұл қаржы жобалау, құрылыс және пайдалану кезеңдерін қамтиды.
29,6 млрд теңгенің бөлінуі мынадай болып отыр: 4,8 млрд теңге – бірлесіп қаржыландыру, 12,9 млрд теңге – инвестициялық шығындарды өтеу, 11,8 млрд теңге – қолжетімділік үшін төлем.
ҚР «Мемлекеттік-жекеменшік әріптестік туралы» заңына сәйкес, қолжетімділік үшін төлем негізінен әлеуметтік сала мен инфрақұрылымда қолданылады. Мұндай жобаларда халықтан тікелей ақы алынбайды немесе қызметтер коммерциялық тарифтер арқылы өзін-өзі ақтамайды.
Дендропарк құрылысы 2028 жылдың екінші жартысында аяқталады деп жоспарлануда.
Лев ГУЗИКОВ
Фотоиллюстрация жасанды интеллект арқылы жасалған