В Атырау +28.2 
Экологтар тұрғындардың шағымдары мен тіркелген шекті мөлшерден асу жағдайларынан кейін АМӨЗ-ге кешенді тексеру дайындап жатқанда, зауыттың өзінде шығарындылардың кәсіпорынмен байланысы әлі дәлелденбегенін айтып отыр.
Атырау мұнай өңдеу зауытының Экология және еңбекті қорғау департаментінің директоры Арман Димукашев кәсіпорын басшылығы бүгін облыс әкімінің жанындағы аппараттық кеңеске қатысып, онда Атыраудағы ауа сапасына қатысты жағдай талқыланғанын хабарлады.
Оның айтуынша, жиында АМӨЗ-ге жақын орналасқан Химпоселокта хош иісті көмірсутектер мөлшерінің артуы туралы ақпарат бөлек айтылды. Бұл деректерді санитариялық-эпидемиологиялық қызмет Экология департаментімен бірлесіп алған.
Сонымен бірге соңғы күндері ластаушы заттардың мөлшерден тыс артуы Атыраудың басқа да жерлерінде тіркелді. Бұған дейін экологтар мониторинг нәтижесі мен желдің бағытын ескере отырып, із АМӨЗ жаққа алып баратынын және қазір кәсіпорынды кешенді жоспардан тыс тексеруге құжаттар дайындап жатырғанын хабарлаған еді.
Дегенмен зауытта тіркелген шығарындылардың дәл осы кәсіпорынның жұмысымен байланысты екенін әлі растамай отыр.
— Қазір кәсіпорын мамандары тіркелген шектен асу жағдайларының зауыт жұмысымен байланысты болу-болмауын анықтап жатыр. Қосымша ақпаратты кейін хабарлаймыз, — деді Димукашев.
Ол сондай-ақ АМӨЗ-дің штаттық технологиялық режимде жұмыс істеп тұрғанын және мұнай өнімдерін өндіруді жалғастырып жатқанын мәлімдеді. Оның айтуынша, кәсіпорында жоспарлы да, жоспардан тыс та экологиялық мониторинг жүргізіледі.
Бұл ретте зауыттың өзі жүргізген өлшеу нәтижесі тексеруге себеп болған деректерден өзгеше.
— Біз бұл қала тұрғындарының алаңдап отырғанын көріп отырмыз. Өзіміз де осы қалада тұрамыз. Осы күндері зертханалар жүзден астам өлшем жүргізді, олар бойынша ешқандай ауытқу анықталған жоқ, — деді Димукашев.
Осылайша, мемлекеттік қызметтер шектен асуды тіркеп, экологтар АМӨЗ-ді тексеруге дайындалып жатқанда, кәсіпорынның өз мониторингі ешқандай заңбұзушылықты көрсетпей отыр. Ластану көзін түпкілікті анықтау әзірге алдағы тексерудің еншісінде.
Айнұр САПАРОВА