В Атырау +29.2 
Жангелдин ауылындағы отбасы мүшелерін өлтіру ісі бойынша шығарылған үкім заңды күшіне енді. Өмір бойына бас бостандығынан айырылған Сұлтан Сәрсемалиев пен оның қорғаушысы апелляциялық шағым бермеді. Процестің басқа қатысушылары да үкімді даулаған жоқ.
Осылайша судья Зарема Хамидуллина тағайындаған жаза өзгеріссіз қалды. Жақын күндері Сәрсемалиев жазасын өтеу үшін қылмыстық-атқару жүйесі мекемесіне жіберіледі.
Дегенмен іс мүлде шағымсыз аяқталған жоқ. Жалғыз арызды Kaspi Bank түсірді. Ол Сәрсемалиевке қатысты үкімге емес, соттың банкке жолдаған жеке қаулысына байланысты.
Тергеу барысында Сәрсемалиев 2025 жылғы 14 мамыр мен 21 маусым аралығында қайтыс болған Наурыз Мұқанғалиевтің атына тауарлық несиелер рәсімдеп, ақшаны қолма-қол алғаны анықталды.
Жалпы сомасы — 4 048 570 теңге.
Сот бұл қаражат банкке тиесілі деп шешті. Kaspi Bank кейіннен тиісті қарызды есептен шығарды.
Судья банкке ішкі ережелерді қайта қарауды, атап айтқанда клиенттерді міндетті түрде бейнесәйкестендіруден өткізуді енгізуді ұсынды.
Алайда банк бұл қаулымен келіспей, өзін осы эпизод бойынша жәбірленуші тарап деп санамайтынын мәлімдеді. Қазір қаржы ұйымы сот шешімінің дәл осы бөлігін даулауда.
Айгүл МАНСУРОВА