​Атырау облысындағы инфляция елдегі орташа көрсеткіштен асып түсті

2026 жылдың тамыз айының қорытындысы бойынша Қазақстанда жылдық инфляция 9,8%-ды құрады. 

Шілдеде бұл көрсеткіш 10,2% деңгейінде болған еді, деп хабарлады Ұлттық статистика бюросы.

Бір ай ішінде баға орта есеппен 0,6%-ға өсті — бұл шілдедегі көрсеткішпен бірдей.

Жылдық өсім бойынша азық-түлік тауарлары 9,5%-ға, азық-түлік емес тауарлар 11,4%-ға, ал ақылы қызметтер 8,9%-ға қымбаттады.

Жыл ішінде бағасы ең айтарлықтай өскен тауарлар мен қызметтер:

• Тарату желілері арқылы тасымалданатын газ — 20%-ға;
• Тұрғын үйді жалға алу — 17,1%-ға;
• Шұжық және ет өнімдері — 14,3%-ға;
• Жеке пайдаланылатын тауарлар — 13,1%-ға;
• Қышқыл сүт өнімдері — 13%-ға;
• Ет және құс еті — 12,9%-ға;
• Бензин — 12,8%-ға;
• Алкогольсіз сусындар — 12,4%-ға.

Сонымен қатар, жыл ішінде көкөніс бағасы 2,5%-ға, жеміс-жидек пен жаңғақтар 0,7%-ға арзандады. Суық судың орташа құны 40,9%-ға төмендеді.

Жылдық инфляцияға негізгі үлесті тамақ өнімдері мен алкогольсіз сусындар қосты — 3,6 пайыздық тармақ.

Тамыз айында ақылы қызметтер 1,2%-ға, азық-түлік емес тауарлар 0,8%-ға қымбаттады. Ал азық-түлік өнімдерінің бағасы бір айда 0,1%-ға төмендеді.

Ең жоғары жылдық инфляция Солтүстік Қазақстан облысында (12%), Жетісу облысында (11,7%) және Ақмола облысында (11,6%) тіркелді. Ең төменгі көрсеткіш Қарағанды облысында байқалды, онда баға 8,1%-ға өскен.

Атырау облысында жылдық инфляция 10,2%-ды құрап, Қазақстан бойынша орташа көрсеткіштен жоғары болды.