В Атырау +12.4 
Ақтауда Каспий теңізінде адам өліміне әкелген қайғылы оқиға болды — бортында жолаушылары бар серуендеу катері жоғары жылдамдықпен жартасты соғып кеткен.
Қайғылы оқиға 30 тамыз күні кешке болған. 5А шағынауданы маңындағы төтенше жағдай туралы хабарлама құтқарушылардың пультіне сағат 22:56-да түскен. Кеменің бортында жеті адам болған.
Іздеу-құтқару операциясы барысында аман қалған бес адам жедел түрде жағаға жеткізіліп, жедел жәрдем дәрігерлеріне тапсырылды.
Алайда тағы екі жолаушыны құтқару мүмкін болмады. Маңғыстау облысының ТЖД алдын ала мәліметінше, олар катерде құтқару кеудешесінсіз болған. Біраз уақыттан кейін олардың денелері жағадан 500 метр қашықтықтан табылып, судан шығарылды.
Іздеу-құтқару жұмыстары теңіз акваториясында кең ауқымда жүргізілді. Оқиғаның салдарын жою және іздестіру жұмыстарына:
ТЖД: 35 құтқарушы, 4 арнайы техника және 4 жүзу құралы;
Полиция: 10 қызметкер және 4 арнайы автокөлік;
Медицина қызметкерлері: Апаттар медицинасы орталығының бригадалары және жедел жәрдемнің 5 экипажы жұмылдырылды.
Суда болған түнгі қайғылы оқиғаның нақты мән-жайы мен себептерін қазір мамандар анықтап жатыр.