В Атырау +30.4 
Қазақстан Ұлттық қорының валюталық активтері 2029 жылға қарай 70,6 миллиард долларға дейін өсуі мүмкін. Экономиканы дамытудың базалық сценарийі шеңберіндегі бұл болжамды Үкімет отырысында Премьер-министрдің орынбасары – Ұлттық экономика министрі Серік Жұманғарин мәлімдеді.
Ведомство есептеулеріне сәйкес, қордың валюталық жинағы 2027 жылғы 65,2 миллиард доллардан 2029 жылы 70,6 миллиард долларға дейін көбейеді.
Түсімдер мен таза кіріс
Базалық сценарий кезінде Ұлттық қорға түсетін жалпы кіріс көлемі былайша бөлінеді:
2027 жыл: 5,1 триллион теңге (таза кіріс — 0,5 триллион теңге);
2028 жыл: 5,5 триллион теңге (таза кіріс — 1,4 триллион теңге);
2029 жыл: 5,7 триллион теңге (таза кіріс — 2 триллион теңге).
Бюджетке қанша қаржы алынады?
Үкімет Ұлттық қордан кепілдендірілген және нысаналы трансферттер түрінде алынатын қаражат көлемін бекітті.
Республикалық бюджетке берілетін кепілдендірілген трансферт 2027 және 2028 жылдары жыл сайын 2,4 триллион теңгеден болса, 2029 жылы 2 триллион теңгеге дейін азаяды.
Бұдан бөлек, аса маңызды инфрақұрылымдық нысандар мен жалпыұлттық ірі жобаларды қаржыландыру үшін нысаналы трансферт тарту көзделген:
2 триллион теңге — 2027 жылы;
жыл сайын 1,5 триллион теңгеден — 2028 және 2029 жылдары.