В Атырау +23 
Шығыс Қазақстан облысында «AK Metal» ЖШС басшысы Д.К. Бектеміров темір кенін заңсыз өндіру ісі бойынша бір жылға бас бостандығынан айырылды.
Тергеу мәліметтеріне сәйкес, серіктестіктің лицензиясы тек қатты пайдалы қазбаларды барлауға ғана рұқсат берген. Дегенмен, зертханалық және технологиялық зерттеулер деген желеумен іс жүзінде темір кені мен темір кені концентратын өнеркәсіптік өндіру жұмыстары жүргізілген.
Өндірілген өнім кейін Қазақстанда және шетелде сатылған. Тергеу деректері бойынша, жалпы жиынтығы 70 мың тоннадан астам өнім заңсыз өндіріліп, сатылған.
Жұмыстардың салдарынан топырақ қабаты бұзылып, табиғи бедер мен ландшафт өзгеріске ұшыраған, сондай-ақ тау-кен қазбалары мен үйінділері пайда болған. Бұл аумаққа едәуір техногендік әсер етті.
Түскен қылмыстық табыс 1 млрд теңгеден астам сомаға бағаланды. Тергеу анықтағандай, бұл қаражатқа қымбат активтер сатып алынған: Алматы қаласы мен Алматы облысынан Land Rover автокөлігі, бес бөлмелі пәтер, үш коммерциялық нысан, екі автотұрақ орны және екі жер телімі.
Сот құны 1 млрд теңгеден асатын бұл мүлікті мемлекет кірісіне тәркіледі.
Үкім әлі заңды күшіне енген жоқ.