В Атырау +33.8 
Атырау облысының әкімі Болат Ақшолақов жаңа оқу жылына дайындық мәселесін талқылаған жиында мектептердегі қауіпсіздікке ерекше назар аударды.
Облыста 625 білім беру ұйымы бар, оның ішінде 201 мектеп жұмыс істейді. Жаңа оқу жылында 6 мектеп ашылып, тағы 3 мектеп жаңа ғимаратқа көшеді.
Әкім үш ауысымды мектептер санын азайту үшін жөндеу және жаңа нысандарды пайдалануға беруді жеделдетуді тапсырды. Қауіпсіздік бағытында 167 ұйым дабыл түймелерімен және бейнебақылаумен жабдықталған, 124 мектеп күзетпен қамтылған. Сонымен қатар “Байқау” және “Назар” жобалары іске асуда.
Ақшолақов білім беру басқармасы мен төтенше жағдайлар департаментіне осы аптаның соңына дейін жаңа нысандардың рұқсат құжаттарын реттеуді, Ломоносов атындағы мектептің құрылысын жеделдетуді және мектеп маңындағы қауіпсіздікті күшейтуді тапсырды. Ол жасанды жол кедергілері мен жол белгілерін орнату қажеттілігін анықтау үшін мектептерді аралап шығуды міндеттеді.
Сонымен бірге, инклюзивті білім беру орталығын жобалау кезеңінде кадрлық қамтамасыз ету мәселесін қарастыруды жүктеп, білікті мамандарды тарту үшін бәсекеге қабілетті жағдай жасау керектігін атап өтті.