В Атырау +34.8 
Қаржылық мониторинг агенттігі азаматтардың жеке мәліметтері мен банктегі ақшасын иемдену үшін SMS-бластер арқылы фишинг хабарламаларын жаппай таратқан қылмыстық топтың жолын кесті. Оңтүстік-Шығыс Азия елдерінің бірінің азаматы ұйымдастырған заңсыз схемаға Астана қаласында арнайы жабдықтың жұмысын қамтамасыз еткен жергілікті тұрғындар тартылған.
Қылмыстық схеманың жұмыс істеу механизмі:
SMS-бластер қолдану: Ұялы байланыс операторларының сүзгілеу жүйелерін айналып өтіп, базалық станция жұмысын имитациялайтын құрылғы пайдаланылған;
Масштабы: Төрт күн ішінде Beeline, Kcell және Activ желілерінің пайдаланушыларына белгілі компаниялардың атынан «бонустарды айырбастау» туралы 150 мыңға жуық жалған SMS жіберілген;
Деректерді ұрлау: Хабарламадағы сілтеме арқылы жалған сайтқа өткен қолданушылардың банк картасының деректемелері, CVV-кодтары мен SMS-растау кодтары қолды болған.
Тәркіленген SMS-бластер ақпаратты жасырын алуға арналған арнайы техникалық құрал болып танылды. Осы дерек бойынша ҚР Қылмыстық кодексінің 399-бабы 2-бөлігі бойынша сотқа дейінгі тергеп-тексеру басталып, төрт күдікті қамауға алынды.
ҚР Қылмыстық-процестік кодексінің 201-бабына сәйкес тергеудің өзге ақпараттары жария етуге жатпайды.