Қарашығанақтағы жаңа газ зауытының құны мен мердігерлері белгілі болды

Қазақстанда Қарашығанақ кен орнында жаңа газ өңдеу зауытын (ГӨЗ) салуға дайындық жалғасуда. «QazaqGaz» ұлттық компаниясы мен KPO (Karachaganak Petroleum Operating) операторы Жол картасы мен негізгі шарттың талаптарын келісу процесінде. Бұл ретте болашақ кәсіпорын үшін шикі газды жеткізу (алу) туралы құжаттың өзіне әлі қол қойылған жоқ, деп хабарлайды «Нефть и газ Казахстана».

Ауқымды жобаны іске асыру шеңберінде «ҚазМұнайГаз» жаңа өндіріс үшін барлық техникалық және жобалық құжаттаманы, әзірлемелерді және жер телімін «QazaqGaz» пайдасына толығымен тапсырды.

Жобаны кім салады және ол қанша тұрады:

Жобалық кезеңдерді (FEED және «Жоба») техникалық сүйемелдеу және пысықтау үшін «QazaqGaz» еншілес құрылымы — «QazaqGaz Processing» (QGP) ЖШС қайта ұйымдастырылды. Компанияда басшылық құрамы жасақталып, салалық мамандарды жұмысқа қабылдау жалғасып жатыр.

Процесті жеделдету үшін «QazaqGaz» жобалау кезеңіне (FEED) және EPC-келісімшартын жасасу процедурасына өтуге бастамашы болды.

• Мердігерлер: ҚР Үкіметінің қаулысымен оңтүстік кореялық Hyundai Engineering Co. LTD және италиялық Sicim S.p.A. кірген халықаралық консорциум бас мердігер (EPC) болып белгіленді.

• Құны: EPC-келісімшартының жалпы сомасы шамамен 6 миллиард долларға бағаланып отыр. Оның 3,5 миллиард долларға жуығы жұмыстардың базалық көлеміне, ал тағы 2,5 миллиард доллары қуаттылығы жылына 5 миллиард текше метр газды құрайтын толық циклді өңдеу зауытын іске асыруға жұмсалады.