В Атырау +27.1 
Қаладағы «Жастар – Еркінқала» бағытындағы автомобиль жолын қайта жаңғырту жұмыстары аясында «Көктем» базары тұсындағы 530 метрлік учаске көлік қозғалысына берілді.
Жолдың жалпы конструкциялық қалыңдығы 80 см. Мұнда инженерлік желілер көшіріліп, үш автотұрақ жасалды. Қазір екі жақта жаяу жүргіншілерге арналған тротуар салынып жатыр, ал аялдамалардағы автобус павильондары жаңасына ауыстырылады.
Жоба бойынша бүгінге дейін 4 шақырым жолға асфальт төселді. Ал Жұмыскер шағын ауданындағы Тайманов мектебінен Сатыбалдиев көшесіне дейінгі 2,4 шақырым учаскеде дайындық жұмыстары жүргізілуде.
Жолдың жалпы ұзындығы – 11,8 шақырым. Оның 8,7 шақырымы төрт жолақты, ені 15 метрге дейін кеңейтіледі. Қалған 3,1 шақырым екі жолақты болып қалады. Жоба аясында жолдың өткізу қабілетін арттырумен қатар, тұрғындар үшін қауіпсіз әрі қолайлы қозғалыс жағдайын жасауға басымдық берілуде.
Сонымен қатар Ерік каналындағы көпірді қайта жаңғырту, су өткізгіш құбырлар орнату және Ракуша, Балауса, Өркен, Жұмыскер шағын аудандарында қосымша өтпелер салу жоспарланған. Бұл негізгі төрт жолақты жолға тікелей шығуды шектеп, қозғалыс қауіпсіздігін арттыруға мүмкіндік береді.
Жол құрылысының бас мердігері – «Атырауинжстрой-АИС» ЖШС. Жұмыстарды 2028 жылдың соңына дейін аяқтау көзделген.