В Атырау +27.1 
Герцог пен герцогиня Сассекстердің, яғни ханзада Гарри мен Меганның АҚШ-тан Ұлыбританияға оралуы олардың қауіпсіздігі мәселесін қайтадан күн тәртібіне шығарды: мемлекет есебінен телохранительдер беріле ме, берілсе қандай деңгейде болады.
Гарри мен Меган Лондоннан тыс жеке резиденцияға көшуді жоспарлап отыр. Балалары — жеті жастағы Арчи мен бес жастағы Лилибет қыркүйекте жергілікті мектепке барады, деп хабарлайды BBC.
2020 жылы олар корольдік міндеттерден бас тартқаннан кейін мемлекеттік күзеттен айырылып, АҚШ-та жеке қауіпсіздік фирмасын жалдаған. Би-би-си олардың Британияда да сол фирма қызметін жалғастыра ма деген сұраққа жауап ала алмады.
Енді олардың қауіпсіздігіне қатысты шешімді Ішкі істер министрлігі жүйесіндегі тәуелсіз орган — Ravec қабылдайды. Бұған дейін Ravec Гарридің сирек келуіне байланысты әр сапарды жеке қарастыратын.
Премьер-министр Энди Бернем бұл мәселе олардың жеке ісі екенін айтты. Ішкі істер министрлігі Ұлыбританияда қауіпсіздік шаралары сенімді екенін, бірақ егжей-тегжейлі ақпаратты жария ете алмайтынын мәлімдеді.
Өткен жылы Гарри сотта жеңіліп, жоғары деңгейлі мемлекеттік күзетке қол жеткізе алмады. Енді қоныс аударғаннан кейін ол Ravec шешімімен мемлекет есебінен белгілі бір деңгейдегі күзетке ие болуы мүмкін.
Алайда олар ресми міндеттерді атқармайтындықтан, күзет деңгейі бұрынғыдан төмен болуы ықтимал. Басқа корольдік отбасы мүшелері де міндеттерін орындамаса, төмен деңгейлі күзет алады. Гарридің әскери қызметтегі тәжірибесі және жұптың қоғамдық мәртебесі бұл мәселені даулы етуі мүмкін.
Егер ол жоғары деңгейлі мемлекеттік күзетке қол жеткізе алмаса, қосымша қауіпсіздік үшін жеке қаражатынан төлеуге тура келеді. Өткен жылы Гарри Би-би-си-ге берген сұхбатында төмен деңгейлі қауіпсіздік жағдайында отбасын Британияға әкелуді елестете алмайтынын айтқан еді.
Ал қазір олардың көшу себебін жақын дереккөз «жұлдыздардың тоғысуы» деп сипаттап, Гарри мен Меган саяхаттауды жақсы көретінін, енді біраз уақыт Британияда тұруды ұйғарғанын жеткізді.
Бұл шешім әлемдік баспасөз үшін ғана емес, тіпті король Карл III үшін де күтпеген жаңалық болды: оған бұл туралы 16 тамызда ғана хабарланған. Король енді Гарри мен немерелерін жиі көруге үміттеніп отыр.
Шілде айында Гарри мен Меган балаларымен бірге Англияға келіп, Глостерширдегі Хайгроув резиденциясында корольмен кездескен. Бұл төрт жылдан кейінгі алғашқы кездесу болды.
Король Карлға екі жарым жыл бұрын қатерлі ісік диагнозы қойылған, ал Гарри өткен жылы Би-би-си-ге берген сұхбатында әкесін жиі көргісі келетінін айтқан.
Гарри мен Меган Калифорниядағы үйлерін сатуды жоспарламайды. Меган медиа саласындағы жұмысын және As Ever маркасымен онлайн өнім сататын бизнесін жалғастыра береді, оны Британияда отырып та жүргізе алады.