В Атырау +23 
Қазақстандық мамандар автомобиль жолдары мен көпірлердің тозуын болжау үшін жасанды интеллектіні енгізуді жоспарлап отыр. «ҚазжолҒЗИ» АҚ сарапшылары Қытайдың озық цифрлық технологияларын зерттеп, оларды елдің қатаң климатына бейімдеу мүмкіндіктерін бағалауда.
Институт делегациясы «2026 Engineering Capacity Building Program» халықаралық бағдарламасы шеңберінде Нанкин қаласында біліктілікті арттырудан өтті. Инженерлер Аспан асты елінің бірнеше негізгі бағыттар бойынша тәжірибесін зерттеді.
Ғалымдардың қызығушылығын тудырған басты инновациялар:
Трассаларды ақылды басқару: Цзянсу провинциясында ЖИ жүйелері жол қозғалысы туралы деректерді нақты уақыт режимінде жинайды, ЖКО-ны автоматты түрде тіркеп, кептелістерді алдын ала болжайды. Бұл мәселелердің салдарымен күресуден олардың алдын алуға көшуге мүмкіндік береді.
Көпірлерді үздіксіз бақылау: Янцзы өзені арқылы өтетін өткелдерде қауіп-қатерлерді анықтау үшін конструкциялардың деформациясы мен дірілін тәулік бойы бақылайтын Structural Health Monitoring датчиктері жұмыс істейді.
Жаңа буын материалдары: ғалымдарға өзін-өзі қалпына келтіретін және энергия тиімді жабындар, сондай-ақ аса берік асфальтбетондар таныстырылды.
Температураның күрт ауытқуы тән Қазақстан үшін мұндай материалдар мен алгоритмдерді енгізу — жол төсемінің жөндеуаралық мерзімін айтарлықтай ұзартудың жолы.
ҚазжолҒЗИ атап өткендей, басты міндет — шұңқырлар пайда болғаннан кейін оларды жамап-жасқау емес, олардың пайда болуының алдын алу. ҚХР-да алынған әзірлемелер жол желісін мониторингтеудің отандық интеллектуалды жүйелерін дамыту үшін пайдаланылады.