В Атырау +35.6 
Қазақстанда жоғары және жоғары оқу орнынан кейінгі білім туралы құжаттарды апостильдеудің жаңа ережелері бекітілді. Ғылым және жоғары білім министрлігі тиісті бұйрыққа қол қойды. Өзгерістер 2026 жылғы 29 тамыздан бастап күшіне енеді, деп хабарлайды Казинформ.
Қазақстандықтар бұл қызметті екі жолмен рәсімдей алады: eGov.kz порталы арқылы (ЭЦҚ қажет) немесе ХҚКО («Азаматтарға арналған үкімет») арқылы жеке өзі өтініш бере алады.
Тексеру қалай жүргізіледі?
ХҚКО арқылы жүгінгенде: құжаттар пакетін бастапқы тексеру екі жұмыс күніне дейін уақыт алады. Содан кейін дипломның түпнұсқалығы уәкілетті органның цифрлық жүйесі арқылы тексеріледі.
Деректер базада болмаған жағдайда: сұраныс оқу орнының өзіне жіберіледі. Оқу орны жеті жұмыс күні ішінде оқу фактісін растауға міндетті.
Соңғы қадам: түпнұсқалығы расталғаннан кейін апостиль төрт жұмыс күні ішінде рәсімделеді (немесе дәлелді бас тарту беріледі).
eGov арқылы тапсырғанда: онлайн режиміндегі бастапқы тексеруден кейін Жеке кабинетке дипломның түпнұсқасы мен қосымшасын ХҚКО-ға әкелу қажеттілігі туралы хабарлама түседі.
Тексеру жүргізу үшін қызметті берушіге өтініш білдірушінің жеке деректерге қол жеткізуге келісімі қажет болады.
Қай жағдайда қызметтен бас тартылады?
Ғылым министрлігі бас тартудың негізгі себептерін атап өтті:
құжаттардан қолдан жасау немесе көрінеу жалған деректерді анықтау;
құжаттардың 1961 жылғы Гаага конвенциясының талаптарына сәйкес келмеуі;
өтініш білдірушінің жеке деректерге қол жеткізуге келісім беруден бас тартуы.
Еске сала кетейік, бұған дейін Қазақстанда құқық қорғау органдары 46 жалған дипломды анықтап, оларды дайындаумен айналысқан 20 сайтты бұғаттады.