​Республикалық трассаларда тегін техникалық көмек көрсету қызметі жұмысын бастады

«ҚазАвтоЖол» ұлттық компаниясы Қарағанды өңірлік көлік прокуратурасымен бірлесіп, республикалық маңызы бар автожолдарда жүргізушілерге шұғыл көмек көрсететін жаңа қызметті іске қосты. 

Пилоттық режимдегі арнайы қызғылт сары пикаптар Астана – Аршалы және Астана – Теміртау бағыттарында патрульдік жұмысқа кірісті. Көмек 1403 бірыңғай байланыс орталығы арқылы тегін көрсетіледі.

Техникалық экипаждар мынадай жағдайларда жедел көмекке келеді:

• Дөңгелек зақымданғанда немесе желі шыққанда;
• Көлікте техникалық ақау пайда болып, өшіп қалғанда;
• Көлікті қауіпсіз жерге сүйреп әкету (буксировка) қажет болғанда;
• Трассада жүргізуші өздігінен қозғалысты жалғастыра алмайтын өзге де төтенше жағдайларда.

Сервистің ерекшелігі мен қауіпсіздік шаралары

Арнайы пикаптар қажетті құрал-саймандармен, жабдықтармен және ашық қызғылт сары түсті арнайы жарық сигналдарымен қамтамасыз етілген. Бұл, әсіресе, түнгі уақытта және ауа райы қолайсыз күндері жоғары жылдамдықты жолдардағы апаттық қауіпті азайтуға мүмкіндік береді.

Көмекті қалай шақыру қажет?

• Жолда ақау туындағанда 1403 қысқа нөміріне хабарласыңыз;
• Операторға орналасқан жеріңізді, қозғалыс бағытын және мәселені айтыңыз;
• Көмек келгенше көлікті жолдың жүру бөлігінен мүмкіндігінше қауіпсіз жерге шығарып, авариялық жарық сигналын қосып күтіңіз.

Пилоттық жоба нәтижесі бойынша жүйені республикалық маңызы бар басқа да автожолдарға енгізу жоспарланып отыр.