В Атырау +22.5 
Қазақстанда жеке тұлғалардың несиесін кешіру кезінде салық салу ережелерін қайта қарау жоспарланып отыр. Жойылған қарыздан жеке табыс салығын (ЖТС) алып тастауға дайын, бірақ бұл жеңілдік азаматтардың тек белгілі бір санаттарына ғана қолданылмақ, деп хабарлайды lsm.kz.
Бұл бастама Ұлттық экономика министрі Серік Жұманғариннің төрағалығымен өткен жаңа Салық кодексін енгізу жөніндегі жобалық офистің отырысында талқыланды.
Қазіргі ереже бойынша, егер банк қарыз алушының үмітсіз берешегін кешірсе, бұл сумма заңды түрде азаматтың табысы болып саналады және одан ЖТС төленуі тиіс. Қаржы нарығын реттеу және дамыту агенттігі (ҚНРДА) мен Қаржыгерлер қауымдастығы үмітсіз әрі алаяқтық жолмен рәсімделген несиелерді кешіру кезінде қазақстандықтарды бұл салықтан толық босатуды ұсынды.
Дегенмен, Ұлттық экономика министрлігі бұл мәселеге қатаңдау қарауды жөн көрді.
Кредиті кешірілгенде салықтан кімдер босатылады?
Мемлекеттің ұстанымы — азаматтарға көрсетілетін әлеуметтік көмек пен банктердің коммерциялық тәуекелдерін біріктірмей, арасын ажырату.
Борышы жойылған кезде ЖТС төлеуден мына азаматтарды толық босату жоспарлануда:
қаржылық алаяқтардың әрекетінен зардап шеккендер;
шынымен де ауыр өмірлік жағдайға тап болған қарыз алушылар.
«Егер банк өзінің балансын оңтайландыру үшін жай ғана коммерциялық несиені кешіре салса, бюджет бұдан автоматты түрде салық түсімдерін жоғалтпауы тиіс. Тәсіл теңгерімді болуы керек», — деп атап өтті Серік Жұманғарин.
Министр мемлекеттік органдар мен ҚНРДА-ға егжей-тегжейлі есептеулер жүргізіп, заңда «ауыр өмірлік жағдай» критерийлерінің нақты тізімін бекітуді тапсырды. Ол тізімге мына жағдайларды енгізу жоспарлануда:
мүгедектік алу;
еңбек қабілетінен айырылу;
мүлкі мен табысының мүлдем болмауы.