В Атырау +28 
АҚШ-тың Окленд қаласындағы федералдық сотта Meta корпорациясына қарсы резонансты іс қарала бастады, деп хабарлайды Bild.
Бірнеше штаттың билігі компанияны балалар мен жасөспірімдерді әлеуметтік желілерге тәуелді ететін алгоритмдер қолданды деп айыптап отыр.
29 штаттан түскен талап-арыздардың алғашқысы Калифорния, Колорадо, Кентукки және Нью-Джерси бойынша қаралуда. Айыптаушылардың пікірінше, Meta кәмелетке толмағандар үшін психологиялық қауіптерді жақсы білген, тіпті 13 жасқа дейінгі балалардың деректерін ата-анасының рұқсатынсыз жинаған.
Компанияның өз есебіне сәйкес, ықтимал айыппұл көлемі 1,4 трлн АҚШ долларына жетуі мүмкін. Заңгерлер мұндай астрономиялық соманы өндіріп алу екіталай дейді, бірақ сот Meta-ны Facebook пен Instagram алгоритмдерін түбегейлі өзгертуге міндеттеуі ықтимал екенін атап өтеді. Бұл компанияның негізгі бизнес үлгісіне соққы болуы мүмкін.
Meta барлық айыптауларды жоққа шығарып, ата-аналық бақылау мен жасөспірімдерді қорғауға арналған құралдардың бар екенін алға тартуда. Сот процесінде Марк Цукербергтің өзі, Instagram басшысы Адам Моссери және бұрынғы негізгі қызметкерлер куәлік береді деп күтілуде.