В Атырау +28.1 
Астанада жедел жәрдемнің 23 жастағы фельдшері Ұлдана Мырзуанның өліміне қатысты негізгі сот талқылауы басталды.
Процесс басында оның қаза болған кезіндегі жұбайы, кейіннен қайта отбасын құрған Әділет Зейнел іске жәбірленуші ретінде қатысуын тоқтатуды сұрады.
Тиісті өтінішхатты оның адвокаты Мұрат Мауметов ұсынды. Ол қылмыстық іс бойынша жәбірленуші деп танылған марқұмның анасы Ұлдананың құқықтарын өзі қорғауға ниетті екенін хабарлады.
«Істе марқұмның тағы бір жақын туысы — анасы бар екенін ескере отырып, соттан Зейнелдің жәбірленуші құқықтарын ары қарай жүзеге асырудан бас тартуын тануды және оның қылмыстық іске қатысуын тоқтатуды сұраймын», — деді қорғаушы.
Оның айтуынша, бұл шешім Зейнел мен марқұмның анасы арасындағы өзара келісім бойынша қабылданған. Соттың бұл өтінішхат бойынша соңғы шешімі әлі жарияланған жоқ. Бұған дейін де адвокат Зейнелдің процестік мәртебеден бас тарту ниеті бар екенін айтқан еді.
Жаңа тойдан кейінгі қоғамдық резонанс
Шілде айының соңында әлеуметтік желілерде Ұлдананың қазасынан кейін шамамен сегіз ай өткенде қайта шаңырақ көтерген Әділет Зейнелдің тойынан фотосуреттер пайда болды. Бұл желі қолданушылары арасында қызу талқыға түсті.
Қаза тапқан фельдшердің анасы Сәлима Ешанқұлова сол кезде бұрынғы күйеу баласынан жәбірленуші мәртебесінен бас тартуды ашық түрде сұраған болатын. Ол қылмыстық іс аясында қызының мүддесін өзі қорғайтынын мәлімдеді.
Кейін Зейнел бұл мәртебеден бас тартпайтынын айтып, істі «соңына дейін жеткізгісі» келетінін және «әділдікке қол жеткізу» Ұлдана алдындағы борышы екенін жеткізген еді. Десе де, сот талқылауы басталғаннан кейін оның бұл ұстанымы өзгерді.
Мүлік иелері бірлестігі төрағасына қатысты сот
Сотта айыпталушылар орындығында қаптама кірпіштері мен кондиционер конструкциясы құлаған үйдің ПӘК төрағасы отыр. Іс ҚР Қылмыстық кодексінің 254-бабы 1-бөлігі — «Міндеттерге ұқыпсыз қарау» бойынша қаралуда. Айыпталушының кінәсін сот анықтауы тиіс.
Алғашқы отырыста прокурор айыптау актісін оқып берді. Сот сондай-ақ дәлелдемелерді зерттеу тәртібін бекітті: алдымен жәбірленушілер, одан кейін куәгерлер мен айыпталушы сұралады. Одан кейін іс материалдары мен оған қоса тіркелген видеожазбаларды зерделеу жоспарланған.
Жұртшылықтың жоғары қызығушылығына байланысты сот отырысын Жоғарғы соттың YouTube-арнасынан көрсетуге рұқсат берілді. БАҚ өкілдеріне де процеске қатысып, ақпарат таратуға мүмкіндік жасалды.
Қайғылы оқиға 2025 жылғы 8 қарашада Астанадағы Тәуелсіздік даңғылында болған. Ұлдана Мырзуан ғимараттың қираған жеріне жедел жәрдем бригадасының құрамында келіп, зардап шеккендерге көмектесуге ұмтылған. Осы сәтте оның үстіне қабырғаның қалдықтары мен кондиционер конструкциясы құлаған.
Ауыр жарақат алған бойжеткен он күн бойы реанимацияда жатып, 18 қарашада көз жұмды. Ұлдана Мырзуан кейін «Ерлігі үшін» медалімен қаза тапқаннан кейін марапатталды.
Келесі сот отырысы 20 тамыз сағат 10:00-ге белгіленді.