В Атырау +34 
Шымкент полициясы 21 жастағы Нұрай Серікбайдың өлімі туралы видео астына жазылған даулы пікірдің авторын он сағатқа жетпейтін уақытта анықтады, деп хабарлайды NewTimes.kz.
TikTok қолданушысы «Мен 72 рет пышақтар едім» деген пікір қалдырған. Бұл сөздер марқұм қызға бағытталғандай қабылданып, оның отбасының адвокаты құқық қорғау органдарына жүгінген.
Пікір иесі Дәурен түсініктеме беріп, сөзін қате түсінгенін айтты. Оның айтуынша, ол Нұрайға емес, оған көптеген жарақат салған күдіктіге қатысты жауап берген. Ол қылмысты қолдамайтынын, егер сөзі отбасыға ауыр тиген болса, кешірім сұрайтынын жеткізді.
Марқұмның ағасы Сұлтан Серікбай Нұрай мен оның туыстарына қатысты қорлайтын немесе арандатушы жазбалардың барлығы тіркеліп, қажет болған жағдайда құқық қорғау органдарына жолданатынын ескертті.
Қазіргі уақытта Шымкентте Нұрай Серікбайдың өліміне қатысты сот процесі жүріп жатыр. Шерхан Аймаханға ерекше қатыгездікпен кісі өлтіру, қудалау және мәжбүрлеп некеге тұрғызу айыптары тағылған. Айыптау актісінде Нұрайға 35 пышақ жарақаты салынғаны көрсетілген. Күдіктінің кінәсі сот үкімі шыққанға дейін дәлелденген жоқ.