В Атырау +31.1 
Қазақстан энергетика министрі Ерлан Аккенженов пен АҚШ елшісі Джули Стаффт өңірлік энергетикалық қауіпсіздік, энергия ресурстарының жеткізілімінің тұрақтылығы және экспорттық инфрақұрылымның сенімді жұмысын талқылады.
Кездесу Қара теңіздегі ҚКҚ теңіз терминалында «Теңізшевройл» мұнайын тиеп жатқан танкерге дрон шабуылы жасалған сәтпен тұспа-тұс өтті. Министрліктің хабарламасында бұл оқиғаның нақты талқыланғаны көрсетілмеген.
Ведомство дерегінше, Қазақстан мен АҚШ энергетика саласындағы стратегиялық әріптестікті нығайтуға мүдделі екенін растады. Тараптар энергия ресурстарын әлемдік нарықтарға үздіксіз экспорттауға ерекше назар аударды. Кездесу қорытындысында Стратегиялық энергетикалық әріптестік аясында диалогты жалғастыруға, инвестиция тартуға және бірлескен жобаларды дамытуға уағдаласты.
Еске салсақ, 30 шілде күні Мәскеу уақытымен 01:48-де Маршалл аралдары туы астындағы NISSOS SIFNOS танкеріне дрон шабуылы жасалды. Кеме ҚКҚ терминалының ВПУ-3 айлағында мұнай тиеу үстінде болған. Жүк жөнелтуші — ЖШС «Теңізшевройл». Шабуыл палубадағы мұнай қабылдау жабдығы орналасқан жерге тиген. Өрт шыққанымен, оны сөндіру мүмкін болды. Зардап шеккендер мен мұнай төгілуі болған жоқ, бірақ тиеу тоқтатылды.
ҚКҚ жүйесі арқылы Қазақстан экспорттайтын мұнайдың шамамен 80%-ы тасымалданады. Сондықтан теңіз терминалындағы кез келген іркіліс ел экономикасына және әлемдік нарыққа жеткізілімге қауіп төндіреді.
Бұған дейін Қазақстанның сыртқы істер министрі Ермек Қошербаев АҚШ мемлекеттік хатшысы Марко Рубиомен телефон арқылы сөйлескен еді.