В Атырау +29.1 
Теңізшевройл» мұнайын тиеп жатқан танкер КҚК-ның Қара теңіздегі теңіз терминалында дрон шабуылына ұшырады. Кеме бортында өрт шығып, мұнай тиеу тоқтатылды.
КҚК баспасөз қызметінің хабарлауынша, шабуыл 30 шілде күні Мәскеу уақытымен сағат 01:48-де болған. Маршалл аралдары туы астындағы NISSOS SIFNOS танкері ВПУ-3 айлақ құрылғысында тұрған. Жүк жөнелтуші ретінде ЖШС «Теңізшевройл» шыққан. Дрон мұнай қабылдау манифольдтары орналасқан палуба бөлігіне соққы жасаған. Өртті экипаж мүшелері КҚК-ның үш қосымша кемесінің көмегімен сөндірді.
Жарақат алғандар жоқ, мұнай төгілуіне жол берілмеді. Экипажға медициналық көмек пен эвакуация қажет болмады. Танкердің жүзу қабілеті сақталған, мамандар зақым көлемін бағалауда.
Сонымен қатар, терминалдан алты теңіз милі қашықтықта Мэн аралы туы астындағы MARATHI танкері де дрон шабуылына ұшырағаны хабарланды. Ол КҚК терминалына мұнай қабылдауға келе жатқан. Екінші соққының салдары әзірге белгісіз.
Теңіз терминалында мұнай тиеу тоқтатылды, бірақ құбыр жүйесінің басқа нысандары қалыпты режимде жұмыс істеп тұр.
КҚК болған оқиғаны террористік шабуыл деп атап, халықаралық энергетикалық инфрақұрылымға, кемелер экипажына және Қара теңіз экологиясына қауіп төнгенін мәлімдеді. Шабуылды кім жасағаны хабарламада көрсетілмеген.
Айта кетейік, КҚК 27 шілдеде терминал маңындағы танкерлерге жасалған алдыңғы шабуылдан кейін мұнай тасымалдауды қайта бастаған еді. Консорциум жүйесі арқылы Қазақстан экспортының шамамен 80%-ы өтеді.
КҚК Қазақстан үшін негізгі экспорттық бағыт болып табылады. Оның арқылы елдің экспорттық мұнайының 80%-дан астамы, соның ішінде Теңіз, Қашаған және Қарашығанақ кен орындарының шикізаты тасымалданады.