В Атырау +29.4 
Өзбекстанда жол құрылысында өзгеріс жасауға дайындалып жатыр. Көрші елде пластик қалдықтары қосылған инновациялық «экоасфальт» төсеу жоспарланып жатыр, деп хабарлайды Inbusiness.kz.
Жергілікті экобелсенді бұл экологиялық стартаптың авторы атанды. Технологияның бірегейлігі сол — стандартты асфальтбетон қоспасының құрамына қайта өңдеуге келмейтін пластиктің белгілі бір түрлері араластырылады. Бұл бір мезгілде екі жаһандық мәселені шешеді: қоқысты кәдеге жаратуға көмектеседі және жол төсемінің сапасын айтарлықтай арттырады.
Жаңа материалдың алғашқы зертханалық сынақтары нәтижелерімен сарапшыларды таңғалдырып үлгерді. Белгілі болғандай, пластик жолдар біз үйренген әдеттегі асфальттан көптеген көрсеткіштер бойынша асып түседі.
Пластик жолдардың ерекшелігі неде?
Абсолютті төзімділік: бұл әдеттегі жол төсеміне қарағанда жүктемені 2–3 есе жақсы көтереді.
Ылғалдан қорғау: егер стандартты асфальт 1-ден 4 пайызға дейін су сіңірсе (аяз бен ыстықта ол бұзылыды), «экоасфальтта» бұл көрсеткіш бар-жоғы 0,25 пайызды құрайды.
«Мұндай көрсеткіштер материалдың керемет ұзақ мерзімділігін және оның шұңқырлар мен жарықтардың пайда болуына төзімділігін көрсетеді», — деп атап өтті әзірлеушілер.
Жоба ең жоғары деңгейде мақұлданды
Инновациялық стартапты Өзбекстанның Қалдықтарды басқару және циркулярлық экономиканы дамыту агенттігі қолдап үлгерді. Сонымен қатар жоба республика басшылығына егжей-тегжейлі таныстырылды. Ел билігі бұл бастаманы мақұлдап, перспективалы идеяны мүмкіндігінше тезірек экономикалық тұрғыдан тиімді шешімге айналдыру үшін оны іс жүзінде қолдануды кешіктірмеуді тапсырды.
Қазіргі уақытта жоба авторлары қорытынды кезеңге — халықаралық стандарттар бойынша қосымша сынақтар өткізуге дайындалып жатыр, одан кейін пластик асфальт Өзбекстан тасжолдарына жаппай төселе бастайды.