В Атырау -10 
Ресей президентінің баспасөз хатшысы Дмитрий Песков Владимир Путин мен Украина президенті Владимир Зеленскийдің жеке кездесуіне қатысты пікір білдірді, деп хабарлайды «Интерфакс».
Кремльдің ресми өкілінің айтуынша, Ресей көшбасшысы диалогқа дайын, алайда кездесудің форматы мен орны келіссөздердің мақсатына байланысты болмақ.
Кездесу қай жерде өтуі мүмкін?
Песков түсіндіріп өткендей, Владимир Путин ағымдағы күн тәртібін талқылау үшін Зеленскийді Мәскеуде «кез келген уақытта» қабылдауға дайын екенін растады. Ал әлемнің басқа нүктесіндегі кездесуге қатысты Кремльдің ұстанымы нақтырақ.
«Басқа кез келген нүктеде кездесудің мәні тек процесс толықтай финализацияланған (қорытындыланған) жағдайда ғана болады», — деп келтіреді журналистер Песковтың сөзін.
«Нүкте қою» шарты
РФ президентінің баспасөз хатшысы Мәскеуден тыс жердегі кездесуді Ресей басшылығы қақтығысты аяқтауға «нүкте қою» мүмкіндігі ретінде қарастыратынын атап өтті. Алайда, бұл сәт тууы үшін тараптар әлі де белгілі бір жолдан өтуі тиіс.
«Оны финализациялау үшін, нүкте қою үшін әлі үлкен «үй жұмысын» атқару керек», — деп түйіндеді Дмитрий Песков.
Кремль өкілі бұл «үй жұмысының» нақты қандай бөлшектерден тұратынын ашып айтпады. Дегенмен, ол бейтарап аумақта жай ғана келіссөз жүргізу үшін кездесу Мәскеу үшін әзірге басымдық емес екенін аңғартты.